സ്മാര്‍ട്ട് ഫോണ്‍ പൊട്ടിത്തെറിച്ച് യുവാവിന് പൊള്ളലേറ്റു
കോഴിക്കോട്: സ്മാര്‍ട്ട് ഫോണ്‍ പൊട്ടിത്തെറിച്ച് യുവാവിന് പൊള്ളലേറ്റു. റെയില്‍വേ കരാര്‍ തൊഴിലാളിയായ ഫാരിസ് റഹ്‌മാനാണ് പൊള്ളലേറ്റത്. പാന്റിന്റെ പോക്കറ്റില്‍ വെച്ച ‘റിയല്‍മി 8’ എന്ന മോഡലാണ് പൊട്ടിത്തെറിച്ചത്. ഇന്നു രാവിലെ ഏഴ് മണിയോടെയായിരുന്നു സംഭവം. രണ്ടുവര്‍ഷമായി ഫാരിസ് റഹ്‌മാന്‍ ഉപയോഗിച്ചു വരുന്ന ഫോണാണിത്. ഇതുവരെ ഫോണ്‍ ചൂടാകുന്ന പ്രശ്‌നങ്ങളൊന്നും തന്നെ ഉണ്ടായിട്ടില്ലെന്ന് ഫാരിസ് പറഞ്ഞു.ജോലി സ്ഥലത്ത് എത്തിയതിന് ശേഷമാണ് പാന്റിന്റെ പോക്കറ്റില്‍ നിന്ന് തീ വരുന്നത് ഫാരിസിന്റെ ശ്രദ്ധയില്‍ പെട്ടത്. ഉടനെ തന്നെ പാന്റ് ഊരി മാറ്റുകയായിരുന്നു. വസ്ത്രത്തില്‍ തീ പടര്‍ന്ന് ഇയാളുടെ തുടയിലും കാലിനും പൊള്ളലേറ്റു. പരിക്കേറ്റ ഫാരിസ് ബീച്ച് ആശുപത്രിയില്‍ ചികിത്സ തേടി. സംഭവത്തില്‍ പൊലീസില്‍ പരാതി നല്‍കിയിട്ടുണ്ട്. മൊബൈല്‍ ഫോണ്‍ കമ്പനിക്കെതിരെ ഉപഭോക്തൃകോടതിയില്‍ പരാതി നല്‍കുമെന്നും ഫാരിസ് അറിയിച്ചു.
