ഇരുപത്തിരണ്ടുകാരി ആയിഷ നിഹാലയും കൂട്ടരും എം ഡി എം എ എത്തിച്ചിരുന്നത് ബംഗളൂരുവിൽ നിന്ന്, ഒളിപ്പിച്ചത് ആർക്കും സംശയം തോന്നാത്ത ഒരിടത്ത്

ഇരുപത്തിരണ്ടുകാരി ആയിഷ നിഹാലയും കൂട്ടരും എം ഡി എം എ എത്തിച്ചിരുന്നത് ബംഗളൂരുവിൽ നിന്ന്, ഒളിപ്പിച്ചത് ആർക്കും സംശയം തോന്നാത്ത ഒരിടത്ത്

സുൽത്താൻബത്തേരി: മാരക മയക്കുമരുന്നായ എം ഡി എം എയുമായി കാറിൽ വരികയായിരുന്ന ദമ്പതികളടക്കമുള്ള നാല് പേർ പിടിയിൽ. കോഴിക്കോട് സ്വദേശികളായ നല്ലളം കെ ജെ കെ വീട്ടിൽ ഫിറോസ് ഖാൻ (31), പാറപ്പുറം അരക്കിണർ മിഥുൻ നിവാസ് പി കെ യൂസഫലി (26), ഇയാളുടെ ഭാര്യ മാന്തോട്ടം വടക്കൻകണ്ടി ആയിഷ നിഹാല ( 22), കണ്ണൂർ കക്കാട് പറയിലകത്ത് പി നദീർ (26) എന്നിവരാണ് അറസ്റ്റിലായത്. വയനാട് ജില്ലാ പൊലീസ് മേധാവിയുടെ കീഴിലുളള ലഹരി വിരുദ്ധ സ്ക്വാഡും , ബത്തേരി എസ് ഐ സി എം സാബുവും സംഘവും മുത്തങ്ങയിൽ നടത്തിയ വാഹന പരിശോധനക്കിടെയാണ് ഇവർ പിടിയിലായത്.

ബംഗളൂരുവിൽ നിന്ന് കോഴിക്കോട്ടേയ്ക്ക് വിൽപ്പനക്കായി കൊണ്ടുപോകുകയായിരുന്ന 156 ഗ്രാം മയക്കുമരുന്നാണ് ഇവരിൽ നിന്ന് പിടിച്ചെടുത്തത്. കാറിന്റെ മുകൾഭാഗത്തായി ഒളിപ്പിച്ച നിലയിലായിരുന്നു . മയക്കുമരുന്ന് ചില്ലറ വിൽപ്പനക്കായി ഉപയോഗിക്കുന്ന ത്രാസും, കവറുകളും, മറ്റ് ഉപകരണങ്ങളും ഇവരിൽ നിന്ന് പിടിച്ചെടുത്തിട്ടുണ്ട്.

സ്ത്രീകളെ മുൻനിറുത്തി മയക്കുമരുന്ന് കടത്തുന്ന സംഘങ്ങൾ വ്യാപകമായതോടെ പൊലീസ് പരിശോധന കർശനമാക്കുകയായിരുന്നു. ഒന്നരമാസത്തിനിടെ എം ഡി എം എ കടത്താനുള്ള മൂന്നാമത്തെ ശ്രമമാണ് ബത്തേരി പൊലീസ് തകർത്തത്.