തിരുവനന്തപുരം: എയ്ഡഡ് സ്കൂളുകളിലെ അധ്യാപക നിയമനത്തിൽ നിയന്ത്രണം വേണമെന്ന ബജറ്റ് നിര്‍ദ്ദേശത്തെച്ചൊല്ലിയുള്ള തര്‍ക്കത്തിൽ പ്രതികരണവുമായി മുഖ്യമന്ത്രി പിണറായി വിജയൻ. സംസ്ഥാനത്ത് കച്ചവടം മാത്രം ലക്ഷ്യമിട്ട് പ്രവര്‍ത്തിക്കുന്ന സ്കൂള്‍ മാനേജ്മെന്‍റുകളുണ്ടെന്നും അവരെ കര്‍ശനമായി നിയന്ത്രിക്കുമെന്നും മുഖ്യമന്ത്രി വ്യക്തമാക്കി. ബജറ്റ് നിര്‍ദ്ദേശത്തിന്‍റെ പേരിൽ സര്‍ക്കാരിനെ വിരട്ടാൻ വരരുതെന്ന് പറഞ്ഞ മുഖ്യമന്ത്രി ശമ്പളം കൊടുക്കാൻ പറ്റുമെങ്കിൽ സ്കൂള്‍ വാടകയ്ക്ക് എടുത്തു പ്രവര്‍ത്തിപ്പിക്കാനും ബുദ്ധിമുട്ടില്ലെന്ന് വ്യക്തമാക്കി.
“എയ്ഡഡ് സ്കൂളുകള്‍ നടത്തിക്കൊണ്ടു പോകാൻ കഴിയില്ലെന്ന് ചില സ്കൂള്‍ മാനേജമെന്‍റുകള്‍ പറയുന്നതു കേട്ടു. മാനേജ്മെന്‍റുകള്‍ മൊത്തത്തിൽ കൊള്ളരുതായ്മ കാണിക്കുന്നു എന്ന അഭിപ്രായം സര്‍ക്കാരിനില്ല. പുതിയ നിയമനം സംബന്ധിച്ചു മാത്രമാണ് ബജറ്റിൽ നിര്‍ദ്ദേശമുള്ളത്.” മുഖ്യമന്ത്രി പറഞ്ഞു. ബജറ്റിലെ നിര്‍ദ്ദേശം കച്ചവടം ലക്ഷ്യമിട്ടു പ്രവര്‍ത്തിക്കുന്ന സ്കൂള്‍ മാനേജ്മെന്‍റുകളെ ഉദ്ദേശിച്ചാണെന്നും മുഖ്യമന്ത്രി വ്യക്തമാക്കി. ആലപ്പുഴയിൽ സംസാരിക്കുകയായിരുന്നു മുഖ്യമന്ത്രി.
അതേസമയം, സര്‍ക്കാര്‍ എയ്ഡഡ് മാനേജ്മെന്‍റുകളെ അവിശ്വസിക്കുന്നില്ലെന്ന് മുഖ്യമന്ത്രി ചൂണ്ടിക്കാട്ടി. പൊതുവിദ്യാഭ്യാസത്തിൽ എയ്ഡഡ് സ്ഥാപനങ്ങളുടെ പങ്ക് ചെറുതല്ലെങ്കിലും തെറ്റായ രീതിയിൽ പോകുന്നവരെ നേരെയാക്കേണ്ട ഉത്തരവാദിത്തം സര്‍ക്കാരിനുണ്ടെന്നും പിണറായി വിജയൻ വ്യക്തമാക്കി. വഴിവിട്ടു പ്രവര്‍ത്തിക്കുന്ന ചില മാനേജ്മെന്‍റുകളെ തിരുത്താനാണ് പരിശോധന വേണമെന്ന് പറയുന്നത്. പുതിയ ഡിവിഷനുകളും തസ്തികകളും ഉണ്ടാക്കുമ്പോള്‍ സര്‍ക്കാര്‍ അറിയേണ്ടതുണ്ടെന്നും ഈ നിര്‍ദ്ദേശത്തിനെതിരെ ചില മാനേജ്മെന്‍റുകള്‍ നടത്തുന്ന പ്രതികരണങ്ങള്‍ ശരിയാണോ എന്ന് ചിന്തിക്കണമെന്നും മുഖ്യമന്ത്രി പറഞ്ഞു.
