ന്യൂഡല്‍ഹി: ലോക്‌സഭയില്‍ വെച്ച്‌ കോണ്‍ഗ്രസ് നേതാവ് രാഹുല്‍ ഗാന്ധിയെ ട്യൂബ് ലൈറ്റ് എന്ന് വിശേഷിപ്പിച്ച്‌ പ്രധാനമന്ത്രി നരേന്ദ്ര മോഡി. വ്യാഴാഴ്ച ലോക്‌സഭയില്‍ പ്രധാനമന്ത്രിയുടെ പ്രസംഗം തടസ്സപ്പെടുത്തി രാഹുല്‍ ഗാന്ധി സംസാരിക്കാന്‍ മുതിര്‍ന്നതോടെയാണ് മോഡി പരിഹാസവുമായി രംഗത്തെത്തിയത്.
‘ഞാന്‍ 30-40മിനിറ്റുകള്‍ സംസാരിച്ചെങ്കിലും ചിലര്‍ ഇങ്ങനെയാണ് ട്യൂബ് ലൈറ്റ് പോലെ കത്താന്‍ വൈകും.’ പ്രധാനമന്ത്രി നരേന്ദ്ര േമാഡി പറഞ്ഞു. പ്രധാനമന്ത്രിയുടെ പ്രതികരണം കേട്ട ബിജെപി അംഗങ്ങള്‍ സഭയില്‍ പൊട്ടിച്ചിരി മുഴക്കുകയും ചെയ്തു.
അതേസമയം, യുവാക്കള്‍ക്ക് തൊഴില്‍ നല്‍കുന്നതുമായി ബന്ധപ്പെട്ട് മോഡിക്ക് ഒന്നും പറയാനില്ലെന്ന് രാഹുല്‍ ഗാന്ധി മോഡിയുടെ പ്രസംഗത്തോട് പ്രതികരിച്ചു. പാകിസ്താന്‍, നെഹ്‌റു തുടങ്ങിയ കാര്യങ്ങള്‍ മാത്രമാണ് അദ്ദേഹത്തിന് പറയാനുള്ളത്. പലതും പറഞ്ഞ് ജനങ്ങളുടെ ശ്രദ്ധ തിരിക്കുകയാണ് പ്രധാനമന്ത്രി നരേന്ദ്ര മോഡി ചെയ്യുന്നതെന്നും രാഹുല്‍ ഗാന്ധി കൂട്ടിച്ചേര്‍ത്തു.
