9 മാസം പ്രായമുള്ള തന്വികയ്ക്ക് അമ്മ കരള് നല്കും; പക്ഷേ ചികിത്സയ്ക്ക് പണം വേണം
അരിമ്പൂര്: ഒമ്പതുമാസം പ്രായമുള്ള തന്വികയ്ക്ക് കരള് പകുത്തു നല്കാന് അമ്മ തയ്യാറാണ്. എന്നാല് ചികിത്സയ്ക്കായി പണം കണ്ടെത്താനാകാതെ വിഷമിക്കുകയാണ് കുടുംബം. അരിമ്പൂര് പഞ്ചായത്തില് ആറാംവാര്ഡില് വാടകവീട്ടില് താമസക്കാരായ പെരിങ്ങായി സുമേഷ് കുമാറിന്റെയും അഞ്ജലിയുടെയും മകള് തന്വികയ്ക്ക് ജന്മനാ കരള് തകരാറിലായിരുന്നു. അലജില് സിന്ഡ്രോം എന്നതാണ് രോഗമെന്ന് ആശുപത്രി റിപ്പോര്ട്ടില് പറയുന്നു.
അഞ്ജലി കരള് തന്വികയ്ക്ക് പകുത്തുനല്കുന്നതിനുള്ള പരിശോധനകള് എറണാകുളത്തെ ആസ്റ്റര് മെഡിസിറ്റിയില് നടക്കുന്നുണ്ട്. കരള് മാറ്റിവെയ്ക്കാന് ലക്ഷങ്ങള് ചെലവ് വരുമെന്നാണ് ആശുപത്രി അധികൃതര് പറയുന്നത്. സ്ഥിരവരുമാനമുള്ള ജോലിയില്ലാത്ത സുമേഷ് കുമാറിന് വലിയ തുക കണ്ടെത്താനോ ചികിത്സ നടത്താനോ ആവില്ല.
തന്വികയുടെ ചികിത്സയ്ക്കായി ടി.എന്. പ്രതാപന് എം.പി., മുരളി പെരുനെല്ലി എം.എല്.എ., ജില്ലാ പഞ്ചായത്ത് അംഗം ജിമ്മി ചൂണ്ടല് എന്നിവര് രക്ഷാധികാരികളും സ്മിത അജയകുമാര് ചെയര്മാനും അരിമ്പൂര് ഗ്രാമപ്പഞ്ചായത്ത് അംഗം കെ.കെ. ഹരിദാസ് ബാബു കണ്വീനറും വി.ജി. നന്ദകുമാര് ട്രഷററും ആയി സഹായസമിതി രൂപവത്കരിച്ചു.