വെള്ളിയാഴ്ച വൈകിട്ട് പോകേണ്ട ദുബായ് –കോഴിക്കോട് വിമാനം വൈകുന്നു; യാത്രക്കാർ ദുരിതത്തിൽ
ദുബായ്∙ സാങ്കേതിക തകരാറിന്റെ പേരിൽ എയർ ഇന്ത്യാ എക്സ്പ്രസിന്റെ ദുബായ് – കോഴിക്കോട് വിമാനം വൈകുന്നു. ഇന്നലെ (വെള്ളി) വൈകുന്നേരം അഞ്ചിന് പോകേണ്ട ഐഎക്സ് 346 വിമാനം ഇതുവരെയായിട്ടും പുറപ്പെട്ടിട്ടില്ല. യുഎഇ പ്രാദേശിക സമയം 12.30ന് (ഇന്ത്യൻ സമയം ഉച്ചയ്ക്ക് 2ന്) പുറപ്പെടുമെന്നാണ് ഇപ്പോൾ യാത്രക്കാരെ അറിയിച്ചിരിക്കുന്നത്. എന്നാൽ, ഇക്കാര്യത്തിൽ ഇനിയും സ്ഥിരീകരണം ഉണ്ടായിട്ടില്ല.
ചെറിയ കുട്ടികൾ അടക്കം യാത്രക്കാർ 20 മണിക്കൂറിലേറെയായി വിമാനത്താവളത്തിലെ ടെർമിനൽ രണ്ടിൽ കഴിയുകയാണ്. ഇന്നലെ രാത്രി 10നും ഇന്നു പുലർച്ചെ മൂന്നിനും പോകുമെന്ന് അറിയിച്ചെങ്കിലും രണ്ടുമുണ്ടായില്ല.
ഗൾഫ് സെക്ടറിൽ വിമാനങ്ങൾ വൈകുന്നതും സാങ്കേതിക തകരാറിന്റെ പേരിൽ വിമാനങ്ങൾ തിരിച്ചിറക്കുന്നതും തുടർക്കഥയാവുകയാണ്. ഇന്ത്യൻ വിമാന കമ്പനികൾക്കെതിരെയാണ് പരാതികൾ അധികവും. മറ്റു രാജ്യങ്ങളുടെ വിമാന കമ്പനികൾ കൃത്യ സമയത്തു സർവീസ് നടത്തുമ്പോൾ ഇത്തരം സംഭവങ്ങൾ തിരിച്ചടിയാകുന്നത് ഇന്ത്യൻ വ്യോമയാന മേഖലയ്ക്കാണ്.
