വിവിധ സ്ഥലങ്ങളിൽ മാല പൊട്ടിക്കൽ ശ്രമം; മൂന്ന് പ്രതികൾ പിടിയിൽ; മറ്റ് നിരവധി കേസുകളിലും പ്രതികളെന്ന് പൊലീസ്
തിരുവനന്തപുരം: കരമന, നേമം പോലീസ് സ്റ്റേഷൻ പരിധിയിൽ മാല പൊട്ടിക്കൽ ശ്രമം നടത്തിയ പ്രതികൾ പോലീസ് പിടിയിലായി. പള്ളിച്ചൽ വിജയ് തോട്ടിങ്കര വിജയാ ഭവനിൽ വിശാഖ് വിജയൻ (19), വട്ടിയൂർക്കാവ് കൊടുങ്ങാനൂർ പന്തുകളം അർച്ചന ഭവനിൽ അർഷാദ് എന്ന ആദർശ് (28), തിരുമല പാങ്ങോട് കുന്നുവിള വീട്ടിൽ അഖിൽജിത് എന്ന ജിബിൻ (27) എന്നിവരെയാണ് നേമം പോലീസ് അറസ്റ്റ് ചെയ്തത്. ജനുവരി നാല് ബുധനാഴ്ച രാത്രിയാണ് കേസിനാസ്പദമായ സംഭവങ്ങൾ നടന്നത്.
പ്രതികൾ നേമം പകലൂർ റോഡിൽ സ്ത്രീയുടെ മാല പൊട്ടിക്കാൻ ശ്രമിക്കുകയും സ്ത്രീക്ക് പരിക്കേൽക്കുകയും ചെയ്തു. ഇതിനുശേഷം നേമം സ്റ്റുഡിയോ റോഡിലുള്ള ബേക്കറിയിലും മാല പൊട്ടിക്കാൻ ശ്രമം നടത്തി വാഹനത്തിൽ രക്ഷപ്പെടുകയും വീണ്ടും കരമന മേലാറന്നൂർ ഭാഗത്ത് മെഡിക്കൽ സ്റ്റോറിൽ മാല പൊട്ടിക്കാൻ ശ്രമം നടത്തുകയും ചെയ്തു. സംഭവത്തെ തുടർന്ന് ഫോർട്ട് അസിസ്റ്റൻറ് കമ്മീഷണറുടെ നേതൃത്വത്തിൽ സ്പെഷ്യൽ ടീമിനെ രൂപീകരിച്ച് അന്വേഷണം ആരംഭിച്ചു. പിടിയിലായ മൂന്നു പേരും തിരുവനന്തപുരം സിറ്റിയിൽ നിരവധി കേസുകളിൽ പ്രതികളാണ്. ഫോർട്ട് എ.സി ഷാജിയുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.