വനിതാ ഡോക്ടറുടെ കൈയില് കടന്നുപിടിച്ചു, കുട കൊണ്ട് ചെറുത്തതോടെ ആക്രമണം; 57-കാരന് അറസ്റ്റില്
റോഡരികിലൂടെ നടന്നുവരുകയായിരുന്ന ഡോക്ടറെ എതിര്വശത്തുനിന്നുവന്ന പ്രതി കൈയില് കടന്നുപിടിക്കുകയായിരുന്നു. അപമാനിക്കാന് ശ്രമിക്കുന്നതിനിടെ യുവ ഡോക്ടര് കുട ഉപയോഗിച്ച് തടയാന് ശ്രമിച്ചപ്പോള് പ്രതി, ഡോക്ടറെ ആക്രമിച്ചു.
കിളിമാനൂര്: വനിതാ ഡോക്ടറെ വഴിയില് തടഞ്ഞുനിര്ത്തി അപമാനിക്കാന് ശ്രമിക്കുകയും ആക്രമിക്കുകയും ചെയ്തയാള് അറസ്റ്റില്. നഗരൂര്, കടവിള, പുല്ലുതോട്ടം വിളയില് പുത്തന്വീട്ടില്നിന്ന് ചാരുപാറ, തയ്യിങ്കളികുന്നില് വീട്ടില് താമസിക്കുന്ന മനോഹരന് എന്നുവിളിക്കുന്ന ശശികുമാര് (57) ആണ് പിടിയിലായത്.
ബുധനാഴ്ച രാവിലെ 8.10-നായിരുന്നു സംഭവം. സംസ്ഥാനപാതയില് കിളിമാനൂര് മിനി സിവില്സ്റ്റേഷനുസമീപം ബസില് നിന്നിറങ്ങി റോഡരികിലൂടെ നടന്നുവരുകയായിരുന്ന ഡോക്ടറെ എതിര്വശത്തുനിന്നുവന്ന പ്രതി കൈയില് കടന്നുപിടിക്കുകയായിരുന്നു.
അപമാനിക്കാന് ശ്രമിക്കുന്നതിനിടെ യുവ ഡോക്ടര് കുട ഉപയോഗിച്ച് തടയാന് ശ്രമിച്ചപ്പോള് പ്രതി, ഡോക്ടറെ ആക്രമിച്ചു. യുവതി ബഹളംവെച്ചപ്പോള് പ്രതി ഓടി രക്ഷപ്പെട്ടു. ഓടിക്കൂടിയ നാട്ടുകാര് വിവരം കിളിമാനൂര് പോലീസില് അറിയിച്ചു. അന്വേഷണം നടത്തിയ പോലീസ് പ്രതിയെ കണ്ടെത്തി പിടികൂടുകയായിരുന്നു.
കിളിമാനൂര് ഐ.എസ്.എച്ച്.ഒ. എസ്.സനൂജ്, എസ്. ഐ. വിജിത്ത് കെ.നായര്, സുനില്കുമാര്, എ.എസ്.ഐ. ഷജിം, എസ്.സി.പി.ഒ. ഷംനാദ്, സി.പി.ഒ. രാജേഷ് എന്നിവര്ചേര്ന്ന് അറസ്റ്റുചെയ്ത പ്രതിയെ കോടതി റിമാന്ഡ് ചെയ്തു.