ഭര്ത്താവിനെയും ഭര്ത്തൃമാതാവിനെയും വിഷംനല്കി കൊലപ്പെടുത്തി; ഭാര്യയും കാമുകനും അറസ്റ്റില്
മുംബൈ: ഭാര്യയും കാമുകനും ചേര്ന്ന് ഭര്ത്താവിനും ഭര്ത്തൃമാതാവിനും വിഷം നല്കി കൊലപ്പെടുത്തി. കവിതയും കാമുകന് ഹിതേഷുമാണ് മാസങ്ങള് നീണ്ട ആസൂത്രണത്തിനൊടുവില് കൊല നടത്തിയത്.
കവിതയും ഭര്ത്താവ് കമല്കാന്തും പിരിഞ്ഞുജീവിക്കുകയായിരുന്നു. എന്നാല് കുട്ടികളെക്കരുതി ഒരുമിച്ച് ജീവിക്കാമെന്ന ധാരണയോടെ വീണ്ടും കമല്കാന്തിനെ കവിത സമീപിച്ചു. കുട്ടികളെയോര്ത്ത് കമല്കാന്തും ഇത് സമ്മതിച്ചു. കവിതയുടെ തിരികെ വരവ് കഴിഞ്ഞ് അധികനാളാകുന്നതിന് മുന്പ് കമല്കാന്തിന്റെ അമ്മ വയറുവേദനമൂലം മരിച്ചു.
വൈകാതെ അമ്മയുടെ അതേ അസ്വാസ്ഥ്യങ്ങള് കമല്കാന്തും പ്രകടിപ്പിക്കാന് തുടങ്ങി. ഇതേത്തുടര്ന്ന് ആശുപത്രിയില് പ്രവേശിപ്പിച്ചു. ആശുപത്രിയില് തുടര്ന്നെങ്കിലും രോഗത്തിന് ശമനമുണ്ടായില്ല. അവസാനം കമല്കാന്തും മരണത്തിന് കീഴടങ്ങി. ഡോക്ടര് നടത്തിയ വിദഗ്ധ പരിശോധനയില് കമല്കാന്തിന്റെ ശരീരത്തില് ഉയര്ന്നതോതില് ആര്സെനിക് കണ്ടെത്തിയിരുന്നു. ഇതാണ് സംശയത്തിന് വഴിയൊരുക്കിയത്.