സ്കൂൾ ബസ് ഡ്രൈവറുടെ അശ്രദ്ധ; കൊച്ചിയിൽ ബസിനടിയിൽപ്പെട്ട കാൽനട യാത്രക്കാരിക്ക് ഗുരുതര പരിക്ക്
കൊച്ചി: സ്കൂൾ ബസിടിച്ച് കാൽനടയാത്രക്കാരിക്ക് പരിക്ക്. ആലുവ പെരുമ്പാവൂർ റോഡിൽ ഇന്നലെ വൈകിട്ട് നാലരയോടെയാണ് അപകടം. പോഞ്ഞാശേരി സ്വദേശി ജമീലയ്ക്കാണ് പരിക്കേറ്റത്. അപകടത്തിന്റെ സിസിടിവി ദൃശ്യങ്ങളും പുറത്തുവന്നിട്ടുണ്ട്.
ചുണങ്ങുംവേലി സെന്റ് ജോസഫ് സ്കൂളിലെ ബസാണ് ജമീലയെ ഇടിച്ചത്. ബസിനടിയിലേയ്ക്ക് തെറിച്ച് വീണ ജമീലയെ നാട്ടുകാരാണ് പുറത്തെടുത്ത് ആശുപത്രിയിലെത്തിച്ചത്. ഇടിയുടെ ആഘാതത്തിൽ ജമീലയുടെ ബോധം നഷ്ടപ്പെട്ടിരുന്നു. ഓർമ വന്നെങ്കിലും എല്ലുകൾക്ക് പൊട്ടലുള്ളതിനാൽ ജമീല ഇപ്പോഴും ആശുപത്രിയിൽ ചികിത്സയിലാണ്.
ഡ്രൈവറുടെ അശ്രദ്ധയാണ് അപകട കാരണമെന്ന് സിസിടിവി ദൃശ്യങ്ങളിൽ വ്യക്തമാണ്. ദൃശ്യങ്ങൾ പരിശോധിച്ച പൊലീസ് സ്കൂൾ ബസ് ഡ്രൈവർക്കെതിരെ കേസെടുത്തിട്ടുണ്ട്.
