മുൻ മന്ത്രി എൻ എം ജോസഫ് അന്തരിച്ചു
കോട്ടയം: മുൻ മന്ത്രിയും ജനതാദൾ(എസ്) സംസ്ഥാന പ്രസിഡന്റുമായിരുന്ന പ്രൊഫസർ എൻ എം ജോസഫ്(79) അന്തരിച്ചു. ഇന്ന് പുലർച്ചെ പാലാ മരിയൻ മെഡിക്കൽ സെന്ററിൽ വച്ചായിരുന്നു അന്ത്യം. ഭൗതികശരീരം ഇന്ന് വൈകിട്ട് പാലാ കടപ്പാട്ടൂരിലെ വസതിയിൽ കൊണ്ടുവരും. നാളെയാണ് സംസ്കാരം.പാലാ സെന്റ് തോമസ് കോളേജിൽ സാമ്പത്തികശാസ്ത്ര വിഭാഗം തലവനായിരുന്നു. 1987 മുതൽ 1991 വരെ നായനാർ മന്ത്രിസഭയിൽ വനംവകുപ്പ് കൈകാര്യം ചെയ്തിരുന്നു. പൂഞ്ഞാർ നിയോജക മണ്ഡലത്തിൽ നിന്ന് പി സി ജോർജിനെ തോൽപ്പിച്ചാണ് എൻ എം ജോസഫ് നിയമസഭയിൽ എത്തിയത്. മന്ത്രിയായിരുന്ന എം പി വീരേന്ദ്രകുമാർ രാജിവച്ച ഒഴിവിലാണ് അദ്ദേഹം മന്ത്രിസഭയിൽ എത്തിയത്. അറിയപ്പെടാത്ത ഏടുകൾ എന്ന പേരിൽ ആത്മകഥ പ്രസിദ്ധീകരിച്ചിട്ടുണ്ട്. കേരള സർവകലാശാല സെനറ്റ് അംഗം, പാലാ മാർക്കറ്റിംഗ് സൊസൈറ്റി പ്രസിഡന്റ് എന്നീ നിലകളിൽ പ്രവർത്തിച്ചിട്ടുണ്ട്. എലിസബത്ത് ജോസഫാണ് ഭാര്യ. ഒരു മകനും ഒരു മകളുമുണ്ട്.
