‘പൊള്ളുന്ന വെയിലിൽ പണിയെടുക്കുന്ന നിരവധി പ്രവാസി മലയാളികൾ കഴിയുന്നത് കണ്ടെയ്നർ ഹോമുകളിലാണ്’, സ്വരാജിന്റെ പരിഹാസത്തിന് മറുപടിയുമായി വി ടി ബൽറാം
കോൺഗ്രസ് നേതാവ് രാഹുൽ ഗാന്ധിയുടെ നേതൃത്വത്തിലുള്ള ഭാരത് ജോഡോ യാത്ര കേരളത്തിൽ മൂന്നാം ദിനം പിന്നിടുകയാണ്. യാത്രയെ പരിഹസിച്ചുകൊണ്ട് സിപിഎം സംസ്ഥാന സെക്രട്ടറിയേറ്റ് അംഗം എം സ്വരാജ് കഴിഞ്ഞ ദിവസം രംഗത്തെത്തിയിരുന്നു.
രാത്രി ഉറക്കത്തിന് സജ്ജമാക്കിയ കണ്ടെയ്നറുകളെ പരിഹസിച്ചു കൊണ്ട് ‘കണ്ടെയ്നർ ജാഥ’ ആർക്കെതിരെയാണെന്നും, ഭാരത് ജോഡോ യാത്രയുടെ റൂട്ട് തയ്യാറാക്കിയിട്ടുള്ളത് ബി ജെ പി ഇല്ലാത്ത സംസ്ഥാനങ്ങൾ തിരഞ്ഞുപിടിച്ചുകൊണ്ടാണെന്നുമായിരുന്നു സ്വരാജിന്റെ പരിഹാസം. ഇപ്പോഴിതാ ഇതിനുമറുപടിയുമായി എത്തിയിരിക്കുകയാണ് കോൺഗ്രസ് നേതാവ് വി ടി ബൽറാം.
ഗൾഫ് നാടുകളിൽ പൊള്ളുന്ന വെയിലിൽ പണിയെടുക്കുന്ന പ്രവാസി മലയാളികളടക്കം നിരവധി പേർ ഇത്തരം കണ്ടെയിനർ ഹോമുകളിലാണ് കഴിയുന്നതെന്നും, “തൊഴിലാളി വർഗ”പാർട്ടിയുടെ പുതുതലമുറ നേതാക്കൾക്ക് ഇത് ആരെങ്കിലും പറഞ്ഞുകൊടുക്കുന്നത് നല്ലതായിരിക്കുമെന്നും ബൽറാം മറുപടി നൽകി. ഫേസ്ബുക്ക് കുറിപ്പിലൂടെയായിരുന്നു പ്രതികരണം.
