സെപ്റ്റിക് ടാങ്കില്‍ വീണ് കാട്ടാന ചെരിഞ്ഞു; സംഭവം തൃശ്ശൂരില്‍
തൃശ്ശൂര്‍: വെള്ളിക്കുളങ്ങര പോത്തന്‍ചിറയില്‍ സെപ്റ്റിക് ടാങ്കില്‍ വീണ് കാട്ടാന ചെരിഞ്ഞ നിലയില്‍. വനാതിര്‍ത്തിയോട് ചേര്‍ന്ന സ്വകാര്യ ഉടമസ്ഥതയിലുള്ള പറമ്പിലെ ഉപേക്ഷിക്കപ്പെട്ട സെപ്റ്റിക് ടാങ്കിലാണ് ആനയുടെ ജഡം കണ്ടെത്തിയത്.
പ്രദേശത്ത് കാട്ടാന ശല്യം രൂക്ഷമാണെന്ന് പരിസരവാസികള്‍ പറഞ്ഞു. കഴിഞ്ഞദിവസങ്ങളില്‍ മൂന്ന് ആനകള്‍ എത്തുകയും കൃഷി നശിപ്പിക്കുകയും ചെയ്തിരുന്നു. ഇവയിലൊന്നാണ് തിങ്കളാഴ്ച രാത്രി കുഴിയില്‍ വീണതെന്നാണ് കരുതുന്നത്. തുമ്പിക്കൈയ്യും തലയും ഉള്‍പ്പെടെ മുന്‍ഭാഗം കുഴിയില്‍ അമര്‍ന്ന നിലയിലാണ് ആനയുടെ ജഡം ഉള്ളത്.
കുഴിയില്‍നിന്ന് ആനയുടെ ജഡം ഉയര്‍ത്തുന്നതിന് ക്രെയിനും ജെസിബിയും ഉള്‍പ്പെടെയുള്ള സംവിധാനങ്ങള്‍ ആവശ്യമാണ്. എന്നാല്‍ ഈ സ്ഥലത്തേക്ക് ഇവ എത്തിക്കാന്‍ റോഡ് ഇല്ലാത്തത് പ്രതിസന്ധി സൃഷ്ടിക്കുന്നുണ്ട്. സ്ഥലത്തേക്ക് ജെസിബി ഉപയോഗിച്ച് വഴിവെട്ടിയശേഷം മാത്രമേ ക്രെയിന്‍ എത്തിച്ച് ജഡം കുഴിയില്‍നിന്ന് പുറത്തെടുക്കാന്‍ കഴിയൂ.
വെള്ളിക്കുളങ്ങര വനംവകുപ്പ് റേഞ്ച് ഓഫീസറുടെ നേതൃത്വത്തില്‍ ഉദ്യോഗസ്ഥര്‍ സ്ഥലത്തെത്തി പരിശോധനകള്‍ നടത്തി. ആനയുടെ ജഡം പുറത്തെടുത്ത് അടുത്തുള്ള വനമേഖലയിലേക്ക് കൊണ്ടുപോയി, അവിടെവെച്ചായിരിക്കും പോസ്റ്റ്‌മോര്‍ട്ടം നടത്തുക. തുടര്‍ന്ന് ജഡം സംസ്‌കരിക്കുമെന്ന് വനംവകുപ്പ് ഉദ്യോഗസ്ഥര്‍ അറിയിച്ചു.
