തോക്കുകൊണ്ട് തലയ്ക്കടിച്ചു, പണം തട്ടിയെടുത്തു ; മലപ്പുറത്ത് യുവാവിനെ മര്ദ്ദിച്ച സുഹൃത്തുക്കള് പിടിയില്
മലപ്പുറം: യുവാവിനെ സുഹൃത്തുക്കള് ചേര്ന്ന് 12 മണിക്കൂറോളം ബന്ദിയാക്കി തോക്കുകൊണ്ട് തലയ്ക്കടിക്കുകയും ക്രൂരമായി മര്ദിക്കുകയും ചെയ്തതായി പരാതി. മലപ്പുറം വളാഞ്ചേരിയിലാണ് സംഭവം. ഇതുമായി ബന്ധപ്പെട്ട് മൂന്ന് പേരെ വളാഞ്ചേരി പൊലീസ് കഴിഞ്ഞ ദിവസം അറസ്റ്റ് ചെയ്തു. ആലപ്പുഴ വള്ളികുന്നം സ്വദേശികളായ കമ്പിളിശ്ശേരി വിഷ്ണു സജീവ് (33), കടുവിനാല് മലവിള വടക്കേില് എസ് സഞ്ജു (31), അപ്പു (30) എന്നിവരാണ് പിടിയിലായത്.
വളാഞ്ചേരി കോഴിക്കോട് റോഡില് പ്രവര്ത്തിക്കുന്ന സ്വകാര്യ വിദ്യാഭ്യാസ ഇന്സ്റ്റിറ്റ്യൂട്ടിന്റെ നോക്കി നടത്തിപ്പുകാരനായ ആലപ്പുഴ സ്വദേശി ശ്രീലാലിനെയാണ് സ്ഥാപനത്തിന്റെ ഉടമ കൂടിയായ സുഹൃത്തും മറ്റു കേസുകളില് ഉള്പ്പെട്ട പ്രതികളും കൂടി ക്രൂരമായി മര്ദ്ദിച്ചത്. ജൂണ് 25നാണ് കേസിനാസ്പദമായ സംഭവം നടന്നത്. നേരത്തെ ജോലി ചെയ്തിരുന്ന സ്ഥാപനത്തില് നിന്ന് പിരിഞ്ഞ ശ്രീലാല് തൊട്ടടുത്തു തന്നെ സമാന സ്വഭാവമുള്ള മറ്റൊരു സ്ഥാപനം തുടങ്ങാന് ശ്രമിച്ചതാണ് സുഹൃത്തുക്കളെ പ്രകോപിപ്പിച്ചതെന്ന് പൊലീസ് പറഞ്ഞു.