നിരവധി മോഷണക്കേസിലെ പ്രതി പിടിയിൽ
തിരുവനന്തപുരം: നിരവധി മോഷണക്കേസിലെ പ്രതി പിടിയിലായി. കുപ്രസിദ്ധ മോഷ്ടാവ് വാമനപുരം പ്രസാദിനെയാണ് (49) വലിയതുറ പൊലീസ് അറസ്റ്റ് ചെയ്തത്. വലിയതുറ ആൾസെയിന്റ്സ് പ്രദേശത്തെ ഒരു പ്രവാസിയുടെ വീട് കുത്തിത്തുറന്ന് സ്വർണം മോഷ്ടിച്ച ഇയാളെക്കുറിച്ച് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു അറസ്റ്റ്.
1993 മുതൽ ജില്ലയിലെ നിരവധി മോഷണക്കേസിലെ പ്രതിയാണ് പ്രസാദ്. നിരവധി തവണ ജയിൽ ശിക്ഷ അനുഭവിച്ചിട്ടുള്ള ഇയാൾ ജയിലിൽ നിന്ന് ഇറങ്ങി വീണ്ടും മോഷണം നടത്തി ആഡംബര ജീവിതം നയിക്കുന്നതാണ് രീതി.
സമീപകാലത്ത് ജയിൽ മോചിതനായ പ്രസാദ് ജില്ലയിൽ പലയിടത്തും മോഷണം നടത്തിയതായി അന്വേഷണത്തിൽ തെളിഞ്ഞതായി വലിയതുറ പൊലീസ് അറിയിച്ചു. ഇയാളുടെ പക്കൽ നിന്ന് മോഷണമുതലും കണ്ടെടുത്തു. ഒരു തെളിവും ലഭിക്കാതിരുന്ന സമയത്ത് സി.സി ടിവി കേന്ദ്രീകരിച്ച് നടത്തിയ അന്വേഷണത്തിലാണ് പ്രതി വലയിലായത്. ശംഖുംമുഖം എ.സി.പി ഡി.കെ. പൃഥിരാജിന്റെ നേതൃത്വത്തിൽ വലിയതുറ എസ്.എച്ച്.ഒ സതികുമാർ എസ്.ഐമാരായ അഭിലാഷ്,അലീന സൈറസ് എന്നിവരടങ്ങിയ സംഘമാണ് പ്രതിയെ പിടികൂടിയത്.
