മംഗളൂരു: ഇന്ന് രാവിലെയാണ് കേരളത്തിൽ നിന്നുള്ള മാധ്യമപ്രവർത്തകരെ മംഗളൂരു പോലീസ് അറസ്റ്റ് ചെയ്തത്. എന്നാൽ ഈ വാർത്തയെ ന്യൂസ് 9 എന്ന ചാനൽ റിപ്പോർട്ട് ചെയ്ത് കേരളത്തിൽ നിന്ന് മാരകായുധങ്ങളുമായെത്തിയ വ്യാജ മാധ്യമപ്രവർത്തകരെ പോലീസ് അറസ്റ്റ് ചെയ്തുവെന്നായിരുന്നു. ഇതിനു പിന്നാലെ തന്നെ ഈ വാർത്തയെ ഏറ്റുപിടിച്ച് കേരളത്തിലെ ബിജെപി നേതാവ് കെ സുരേന്ദ്രനും രംഗത്തെത്തി. തെറ്റായ വാർത്ത പ്രചരിപ്പിക്കുകയായിരുന്നു ബിജെപി നേതാവ് ചെയ്തത്.
മാധ്യമപ്രവർത്തകരുടെ വേഷത്തിലെത്തിയ അക്രമികളെയാണ് മംഗളൂരു പോലീസ് അറസ്റ്റ് ചെയ്തതെന്ന ചാനലിന്റെ ട്വീറ്റിന്‍റെ സ്ക്രീൻഷോട്ട് സഹിതമാണ് സുരേന്ദ്രൻ ഫേസ്ബുക്കിൽ പോസ്റ്റ് ചെയ്തത്. എന്നാൽ ആദ്യം നൽകിയ തെറ്റായ വാർത്ത ന്യൂസ്9 ചാനൽ പിൻവലിച്ചിരിക്കുകയാണ്. അറസ്റ്റ് ചെയ്തത് കേരളത്തിലെ മാധ്യമപ്രവർത്തകരെ തന്നെയാണെന്നാണ് രണ്ടാമതൊരു ട്വീറ്റിലൂടെ ചാനൽ അറിയിച്ചിരിക്കുന്നത്.
ഐഡി പ്രൂഫ് ഹാജരാക്കുന്നതിൽ പരാജയപ്പെട്ടതിനെ തുടർന്ന് കേരളത്തിൽ നിന്നുള്ള ഒരു കൂട്ടം മാധ്യമപ്രവർത്തകരെയാണ് മംഗളൂരു പോലീസ് അറസ്റ്റ് ചെയ്തതെന്നും ഈ വാർത്ത തന്നെയാണ് നേരത്തെ റിപ്പോർട്ട് ചെയ്തതെന്നുമാണ് ചാനൽ വ്യക്തമാക്കിയിരിക്കുന്നത്. പോലീസുകാർ പിന്നീട് മാധ്യമപ്രവർത്തകരെ വിട്ടയച്ചെന്നും ന്യൂസ്9 ട്വീറ്റ് ചെയ്തു.
മാധ്യമപ്രവർത്തകരെ അറസ്റ്റ് ചെയ്തില്ലെന്നും രേഖകൾ പരിശോധിക്കുക മാത്രമായിരുന്നെന്നുമാണ് സുരേന്ദ്രൻ ആദ്യം പറഞ്ഞത്. തെറ്റായി റിപ്പോർട്ട് ചെയ്തതിൽ ചാനൽ വ്യക്തത വരുത്തിയെങ്കിലും ബിജെപി നേതാവ് തന്‍റെ നിലപാടിൽ മാറ്റം വരുത്തിയില്ലെന്നത് ശ്രദ്ധേയമാണ്. രണ്ടാമതൊരു പോസ്റ്റിലും തന്‍റെ നിലപാട് സുരേന്ദ്രൻ ആവർത്തിക്കുകയാണ് ചെയ്തത്. ‘കലാപകാരികളോടൊപ്പം ചേർന്ന് കലാപം ആളിക്കത്തിക്കാൻ നോക്കിയാൽ ഒരു ബഹുമാനവും പ്രതീക്ഷിക്കരുത്. സ്വന്തം രാഷ്ട്രീയനിലപാടുകൾ റിപ്പോർട്ടിംഗിൽ പ്രകടിപ്പിച്ചാൽ തിരിച്ചും എതിർപ്പുകൾ ഉണ്ടാവും.’ എന്നാണ് സുരേന്ദ്രൻ പറയുന്നത്. ആദ്യത്തെ വാർത്ത വ്യാജമാണെന്ന് സമ്മതിക്കാനോ തിരുത്താനോ അദ്ദേഹം തയ്യാറായിട്ടില്ല.
വെള്ളിയാഴ്ച രാവിലെയാണ് മംഗളൂരുവില്‍ മലയാളി മാധ്യമപ്രവര്‍ത്തകരെ പോലീസ് കസ്റ്റഡിയിലെടുത്തത്. മാധ്യമ സംഘത്തില്‍ നിന്ന് ക്യാമറ അടക്കമുള്ളവ പോലീസ് പിടിച്ചെടുക്കുകയും ചെയ്തിരുന്നു. സിറ്റി പോലീസ് കമ്മീഷണറുടെ നേതൃത്വത്തിലായിരുന്നു മാധ്യമപ്രവർത്തകർക്കെതിരായ നടപടി. വ്യാഴാഴ്ച മംഗലാപുരത്ത് ഉണ്ടായ സംഘര്‍ഷത്തില്‍ കൊല്ലപ്പെട്ടവരുടെ മൃതദേഹങ്ങള്‍ സൂക്ഷിച്ചിരിക്കുന്ന വെന്‍ലോക്ക് ആശുപത്രിയ്ക്ക് സമീപത്ത് റിപ്പോര്‍ട്ട് ചെയ്യുകയായിരുന്ന മാധ്യമപ്രവര്‍ത്തകരെയാണ് പോലീസ് കസ്റ്റഡിയില്‍ എടുത്തത്. ഇതേതുടര്‍ന്ന് മാധ്യമ പ്രവര്‍ത്തകരോട് കടന്നുപോകാന്‍ പോലീസ് ഉത്തരവിടുകയായിരുന്നു. വ്യാഴാഴ്ച മംഗളൂരുവില്‍ നടന്ന പ്രതിഷേധത്തിനിടെ രണ്ട് പേര്‍ കൊല്ലപ്പെട്ടിരുന്നു.
