ഒരു പ്രദേശത്തെ മുഴുവൻ കിണറുകളിലും തീ ആളിപ്പടരുന്നു; പാലക്കാട് അപൂർവ പ്രതിഭാസം, അമ്പരന്ന് നാട്ടുകാർ
പാലക്കാട്: പാലക്കാട് ജില്ലയിലെ കിണറുകളിൽ അപൂർവ പ്രതിഭാസം. കൂറ്റനാടും പരിസര പ്രദേശങ്ങളിലുമുള്ള കിണറുകളിലാണ് കടലാസ് കത്തിച്ചിടുമ്പോൾ തീ പടരുന്ന അസ്വാഭാവിക പ്രതിഭാസം കണ്ടെത്തിയത്. പ്രദേശത്ത് വിദഗ്ദ്ധരെത്തി പരിശോധന നടത്തുകയാണ്. കിണറിനുള്ളിൽ വാതക സാന്നിദ്ധ്യം ഉണ്ടെന്നാണ് പ്രാഥമിക നിഗമനം.ഏതാനും നാളുകളായി പ്രദേശത്തെ കിണറുകളിൽ തീപടരുന്നത് ശ്രദ്ധയിൽപ്പെട്ട ഉടമസ്ഥർ വെള്ളം പരിശോധനയ്ക്കായി അയച്ചിരുന്നു. വെള്ളത്തിൽ മിനറൽ ഓയിൽ സാന്നിദ്ധ്യമുണ്ടെന്നാണ് വീട്ടുകാർക്ക് ലഭിച്ച റിപ്പോർട്ട്. ഇതിനകം നിരവധിപേർക്ക് ഇത് സംബന്ധിച്ച പരാതി നൽകിയിട്ടുണ്ടെന്നും കിണറിന്റെ ഉടമസ്ഥർ വ്യക്തമാക്കി. സമീപത്തെ പെട്രോൾ പമ്പിൽ നിന്നും ലീക്ക് സംഭവിക്കുന്നതാണോ ഈ പ്രതിഭാസത്തിന് കാരണമെന്നും നാട്ടുകാർ സംശയിക്കുന്നു.കിണറ്റിൽ നിന്നും രൂക്ഷമായ ഗന്ധം വന്നതാണ് പ്രതിഭാസത്തിന്റെ തുടക്കം. ഏതാണ്ട് ഏഴ് മാസം മുമ്പാണ് ഇത് ആരംഭിച്ചത്. ആദ്യം പരിസരത്തെ ഒരു കിണറ്റിൽ മാത്രമായിരുന്നു ലക്ഷണങ്ങൾ ഉണ്ടായിരുന്നത്. പിന്നീട് മറ്റ് കിണറുകളിലും അനുഭവപ്പെടാൻ തുടങ്ങി. സാമ്പിളുകൾ പരിശോധനയ്ക്കായി അയച്ചിട്ടുണ്ട്. ഫലം വന്നാലുടൻ പ്രശ്നത്തിന് പരിഹാരം കണ്ടെത്താനാകുമെന്നാണ് വിദഗ്ദ്ധർ പറയുന്നത്.
