തല്ലുമാല ലൊക്കേഷനിൽ കൂട്ടത്തല്ല്; നടൻ ഷൈൻ ടോം ചാക്കോ നാട്ടുകാരനെ തല്ലി
കൊച്ചി: തല്ലുമാല സിനിമയുടെ ഷൂട്ടിംഗ് സെറ്റിൽ സിനിമാപ്രവർത്തകരും നാട്ടുകാരും തമ്മിൽ സംഘർഷം. നടൻ ഷൈൻ ടോം ചാക്കോ നാട്ടുകാരനെ തല്ലിയതായും ആരോപണമുണ്ട്. കളമശേരി എച്ച് എം ഡി റോഡിലാണ് ചിത്രത്തിന്റെ സെറ്റിട്ടിരിക്കുന്നത്.പ്രദേശത്ത് പതിവായി സിനിമാലൊക്കേഷനിൽ നിന്നും മാലിന്യം തള്ളിയിരുന്നുവെന്നാണ് നാട്ടുകാർ പറയുന്നത്. ഇത് ചോദ്യം ചെയ്യാനെത്തിയതോടെയാണ് സംഘർഷമുണ്ടായത്.പൊതുനിരത്തിൽ മാലിന്യം ഇടുന്നതും വണ്ടി പാർക്ക് ചെയ്ത് ഗതാഗതക്കുരുക്കുണ്ടാക്കുന്നതും നാട്ടുകാർ പരാതിപ്പെട്ടിരുന്നു. ഇതിനിടിയിലാണ് തർക്കമുണ്ടാകുന്നത്. തർക്കം രൂക്ഷമായതോടെ ടൊവിനോയും ഇടപെട്ടെന്നാണ് അറിയുന്നത്. ഇതോടെ സ്ഥലത്ത് സംഘർഷാവസ്ഥ ഉണ്ടാവുകയായിരുന്നു.പൊലീസ് സ്ഥലത്ത് എത്തി ഇരുകൂട്ടരുമായി സംസാരിച്ച് സ്ഥിതിഗതികൾ ശാന്തമാക്കി. അതേസമയം ആരും പരാതി നൽകിയിട്ടില്ലെന്ന് പൊലീസ് അറിയിച്ചു. ഖാലിദ് റഹ്മാനാണ് ചിത്രത്തിന്റെ സംവിധായകൻ. ടൊവിനോ തോമസും കല്യാണി പ്രിയദർശനുമാണ് ചിത്രത്തിൽ പ്രധാന വേഷത്തിലെത്തുന്നത്.
