ട്രെയിൻ യാത്രക്കാർക്ക് ആശ്വാസവുമായി കെഎസ്ആർടിസി; പുതുക്കാട് യാത്രാതടസത്തിന് പരിഹാരമായി കൂടുതൽ ബസുകൾ
തിരുവനന്തപുരം; തൃശൂരിൽ പുതുക്കാട് ഗുഡ്സ് ട്രെയിൻ പാളം തെറ്റിയതിനെ തുടർന്ന് തടസപ്പെട്ട ട്രെയിൻ ഗതാഗതത്തിന് പകരമായി കൂടുതൽ ബസ് സർവ്വീസുകൾ നടത്തി കെഎസ്ആർടിസി. തൃശ്ശൂരിൽ നിന്നും തിരുവനന്തപുരത്തേക്ക് അഞ്ചും, എറണാകുളത്ത് നിന്നും ആറും, ആലപ്പുഴയിൽ നിന്നും ആറും അധിക ബസുകൾ സർവ്വീസ് നടത്തി.ഇതിന് പുറമേ യാത്രക്കാരുടെ എണ്ണത്തിനനുസരിച്ച് എറണാകുളത്ത് നിന്നും തിരുവനന്തപുരം , കോഴിക്കോട്ട് ഭാഗങ്ങളിലേക്ക് ആവശ്യത്തിന് ബസുകൾ സർവ്വീസ് നടത്താൻ സജ്ജമാക്കിയിട്ടുള‌ളതായി ഗതാഗതമന്ത്രി ആന്റണി രാജു അറിയിച്ചു. ഇത് കൂടാതെ ഏത് സ്ഥലത്തും യാത്രക്കാരുടെ ആവശ്യത്തിന് അനുസരിച്ച് കൂടുതൽ സർവ്വീസുകൾ നടത്താനും നിർദ്ദേശമുണ്ട്. അടിയന്തിരമായി ബസ് സർവ്വീസുകൾ ആവശ്യമുണ്ടെങ്കിൽ കെഎസ്ആർടിസിയുടെ കൺട്രോൾ റൂമിൽ ബന്ധപ്പെടാവുന്നതാണ്.നമ്പർ :+91 4712463799, +91 9447071021, 1800 599 4011.
