ദിലീപിന് ഇന്ന് നിർണായക ദിനം; മുൻകൂർ ജാമ്യഹർജി ഹൈക്കോടതി പരിഗണിക്കും
കൊച്ചി: നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ വധിക്കാൻ ഗൂഢാലോചന നടത്തിയ കേസിൽ പ്രതികളുടെ മുൻകൂർ ജാമ്യാപേക്ഷ ഇന്ന് ഹൈക്കോടതി പരിഗണിക്കും. കേസിലെ പ്രതികളായ ദിലീപ്, സഹോദരൻ അനൂപ്, സഹോദരീ ഭർത്താവ് സുരാജ്, മാനേജർ അപ്പു, സുഹൃത്ത് ബൈജു ചെങ്ങമനാട് എന്നിവരുടെ ഹർജികളാണ് പരിഗണിക്കുക.വ്യാജ തെളിവുകൾ കൊണ്ട് അന്വേഷണ ഉദ്യോഗസ്ഥർ വേട്ടയാടുന്നുവെന്നാണ് പ്രതികളുടെ വാദം. ചോദ്യം ചെയ്യൽ സംബന്ധിച്ച റിപ്പോർട്ട് പ്രോസിക്യൂഷൻ കോടതിയിൽ സമർപ്പിക്കും. പ്രതികൾ മൊബൈൽ ഫോണുകൾ ഒളിപ്പിച്ചെന്നും, ഇതുകണ്ടെത്താൻ കൂടുതൽ ചോദ്യം ചെയ്യണമെന്നുമാണ് ക്രൈംബ്രാഞ്ചിന്റെ നിലപാട്.പ്രതികളെ കസ്റ്റഡിയിൽ ചോദ്യം ചെയ്യണമെന്നും, മുൻകൂർ ജാമ്യം നൽകരുതെന്നും പ്രോസിക്യൂഷൻ ആവശ്യപ്പെടും. തന്റെ ഫോണുകൾ ഹാജരാക്കാനാവില്ലെന്നും, ഇപ്പോൾ അന്വേഷിക്കുന്ന കേസുമായി ബന്ധപ്പെട്ട തെളിവുകൾ ഒന്നും അതിലില്ലെന്നും ക്രൈംബ്രാഞ്ചിന്റെ നോട്ടീസിന് ദിലീപ് ഇന്നലെ മറുപടി നൽകിയിരുന്നു.
ചോദ്യം ചെയ്യാൻ മൂന്നു ദിവസമായിരുന്നു ഹൈക്കോടതി അനുവദിച്ചത്. മൂന്നു ദിവസങ്ങളിലായി 33 മണിക്കൂർ പ്രതികളെ ചോദ്യം ചെയ്തു.കളമശ്ശേരിയിലെ ക്രൈംബ്രാഞ്ച് ഓഫീസിൽവച്ചായിരുന്നു ചോദ്യം ചെയ്യൽ.
