സുമനസുകൾ കനിഞ്ഞാൽ ശബിന്‍ രാജിന് ഇറാനിൽ കളിക്കാം
കാസര്‍കോട്: ശാരീരിക വെല്ലുവിളികള്‍ നേരിടുന്നവരുടെ പശ്ചിമേഷ്യന്‍ ആംപ്യൂട്ടി ഫുട്‌ബോള്‍ ചാമ്പ്യന്‍ഷിപ്പില്‍ കാസര്‍കോട് ചന്തേര സ്വദേശിയായ കെ പി ശബിന്‍ രാജിന് പങ്കെടുക്കണമെന്നുണ്ട്. പക്ഷെ പങ്കെടുക്കാന്‍ പണമില്ല. ഒരു നല്ല സ്‌പോണ്‍സറെ കിട്ടാതെ വിഷമിക്കുകയാണ് 18 അംഗ ഇന്ത്യന്‍ ടീമിലെ ഈ താരം.
വേള്‍ഡ് ആംപ്യൂട്ടി ഫുട്‌ബോള്‍ ഫെഡറേഷന്റെ കീഴില്‍ ഇറാന്‍ ആംപ്യൂട്ടി ഫുട്‌ബോള്‍ ഫെഡറേഷന്‍ സംഘടിപ്പിക്കുന്ന മത്സരം മാർച്ച് മാസത്തിൽ ഇറാനിലെ കിഷ് ഐലന്‍ഡിൽ വെച്ചാണ് നടക്കുക. അടുത്തമാസം 15 നാണ് ഇന്ത്യന്‍ ടീം മത്സരത്തിനായി ഇറാനിലേയ്ക്ക് പുറപ്പെടുന്നത്. 1,60,000 രൂപയാണ് മത്സരത്തില്‍ പങ്കെടുക്കാന്‍ ശബിന്‍ രാജിന് ചെലവ് വരുന്നത്. നിര്‍ധന കുടുംബത്തിലെ അംഗമായ ശബിന്‍ രാജിന് ഇത് താങ്ങാന്‍ കഴിയില്ല.
2019 ല്‍ തൃക്കരിപ്പൂര്‍ ഇ കെ നായനാര്‍ ഗവ. പോളിയില്‍ മൂന്നാംവര്‍ഷ വിദ്യാര്‍ഥിയായിരിക്കെ തൃക്കരിപ്പൂര്‍ തങ്കയത്ത് ബൈക്കില്‍ കാറിടിച്ചിരുന്നു. സുഹൃത്തിനെ റെയില്‍വേ സ്റ്റേഷനില്‍ കൊണ്ടുപോയി തിരിച്ചുവരുന്നതിനിടെയാണ് അപകടം. മംഗളൂരു ആശുപത്രിയിൽ എത്തിച്ചുവെങ്കിലും ശബിന്‍ രാജിന്റെ വലതുകാല്‍ മുറിച്ചുമാറ്റേണ്ടി വന്നു. പിന്നീട് തൊട്ടടുത്ത വര്‍ഷമാണ് പഠനം പുനരാരംഭിക്കാന്‍ കഴിഞ്ഞത്. നല്ല ഫുട്‌ബോള്‍ കളിക്കാരനായ ശബിന്‍ ഒരുകാലുമായാണ് സുഹൃത്തുക്കള്‍ക്കൊപ്പം കളിച്ചുവരുന്നത്. രണ്ട് ഊന്നുവടികളുടെ സഹായത്തോടെയാണ് ഫുട്‌ബോള്‍ കളിക്കുന്നത്.
കഴിഞ്ഞ മാസം തൃശൂരില്‍ വെച്ചു നടന്ന ക്യാംപിലാണ് ശബിനെ ഇന്ത്യന്‍ ടീമിലേക്ക് തെരഞ്ഞെടുത്തത്. ആദ്യമായാണ് ഏഷ്യന്‍ ആംപ്യൂട്ടി ഫുട്‌ബോള്‍ ചാമ്പ്യന്‍ഷിപ്പ് ഇറാനില്‍ വെച്ചു നടക്കുന്നത്. ഇതില്‍ ജയിക്കുന്ന അഞ്ച് രാജ്യങ്ങള്‍ക്ക് ഒക്ടോബറില്‍ തുര്‍ക്കിയില്‍ നടക്കുന്ന ആംപ്യൂട്ടി ഫുട്‌ബോള്‍ ലോകകപ്പില്‍ പങ്കെടുക്കാന്‍ കഴിയും. ഫുട്‌ബോളിനെ സ്‌നേഹിക്കുന്നവര്‍ തന്നെ സഹായിക്കുമെന്നും ഇതിനായി സ്‌പോണ്‍സറെ ലഭിക്കുമെന്ന പ്രതീക്ഷയിലാണ് ശബിന്‍ രാജ്.
പോളിയില്‍ ഡിപ്ലോമ കോഴ്‌സ് പൂര്‍ത്തിയാക്കി ഇപ്പോള്‍ അതേ സ്ഥാപനത്തില്‍ തന്നെ ടാലി ഹ്രസ്വകാല കോഴ്‌സില്‍ ചേര്‍ന്ന് പഠിക്കുകയാണ്. ചന്തേരയിലെ യുണൈറ്റഡ് ടീമില്‍ നിരവധി പ്രാദേശിക ചാമ്പ്യന്‍ഷിപ്പില്‍ പങ്കെടുത്തിരുന്നു. ഹാന്‍ഡ് ബോളില്‍ ജില്ലയെ പ്രതിനിധീകരിച്ച് സംസ്ഥാന ചാമ്പ്യന്‍ഷിപ്പിലും പങ്കെടുത്തിരുന്നു. ചന്തേരയിലെ പി വി രാജന്റെയും കെ പി പ്രിയയുടെയും മകനാണ് ഈ 22 കാരന്‍
