ലക്ഷങ്ങള്‍ കടബാധ്യത;ആഭരണങ്ങള്‍ക്കായി ഭാര്യയുടെ മുത്തശ്ശിയെ കൊന്നു; സ്‌കൂള്‍ അധ്യാപകന്‍ അറസ്റ്റില്‍
മലപ്പുറം: മുട്ടത്ത് ആയിഷയെ (78) കൊലപ്പെടുത്തിയ കേസില്‍ പേരക്കുട്ടിയുടെ ഭര്‍ത്താവ് അറസ്റ്റില്‍. സ്‌കൂള്‍ അധ്യാപകനായ മമ്പാട് സ്വദേശി നിഷാദലിയാണ് അറസ്റ്റിലായത്. ലക്ഷങ്ങള്‍ കടബാധ്യതയുള്ള നിഷാദലി കവര്‍ച്ച ലക്ഷ്യമിട്ടാണ് ഭാര്യയുടെ മുത്തശ്ശിയെ കൊലപ്പെടുത്തിയതെന്ന് പൊലീസ് വ്യക്തമാക്കി. രണ്ടു മാസത്തോളം നീണ്ട അന്വേഷണത്തിനൊടുവിലാണു പ്രത്യേക പൊലീസ് സംഘം പ്രതിയെ പിടികൂടിയത
ജൂലൈ 16ന് രാവിലെ ആയിഷയുടെ വീട്ടിലെത്തിയ നിഷാദലി, ആയിഷയെ ക്രൂരമായി കൊലപ്പെടുത്തുകയായിരുന്നു. ആയിഷ അണിഞ്ഞിരുന്ന ആഭരണങ്ങള്‍ തട്ടിയെടുക്കാനായിരുന്നു കൊലപാതകം. ആയിഷയുടെ മരണവാര്‍ത്ത ഭാര്യ അറിയിച്ചപ്പോഴും ഒന്നുമറിയാത്ത പോലെയാണ് നിഷാദലി പെരുമാറിയത്. മറ്റാര്‍ക്കും സംശയമുണ്ടാക്കാത്ത വിധത്തില്‍ കബറടക്കത്തിലും പങ്കെടുത്തു.
മണിച്ചെയിന്‍ ഇടപാടുകളില്‍ സജീവമായി പ്രവര്‍ത്തിച്ചിരുന്ന നിഷാദലിക്ക് നാടാകെ കടമുണ്ടെന്നാണു വിവരം. മമ്പാട് ഹൈസ്‌കൂളില്‍നിന്ന് 80,000 രൂപയും സിസിടിവികളും കവര്‍ന്നത് താനാണെന്ന് നിഷാദലി സമ്മതിച്ചു. മറ്റു പല കവര്‍ച്ച കേസുകളിലും പ്രതിക്കു പങ്കുണ്ടെന്നാണ് സംശയം. നൂറു കണക്കിന് സിസിടിവി ദൃശ്യങ്ങള്‍ ശേഖരിച്ചും ഒട്ടേറെപ്പേരെ ചോദ്യം ചെയ്തുമാണു പ്രതിയെ പിടികൂടിയത്.
