ഓടുന്ന കാറിൽ നിന്ന് റോഡിലേക്ക് വലിച്ചെറിഞ്ഞത് യുവതിയുടെ അർദ്ധ നഗ്നമായ മൃതദേഹം; സംഭവം കൊലപാതകമെന്ന് പൊലീസ്
കോയമ്പത്തൂർ: നഗരമദ്ധ്യത്തിൽ ഓടിക്കൊണ്ടിരുന്ന എസ്യുവി കാറിൽ നിന്നും റോഡിലേക്ക് യുവതിയുടെ മൃതദേഹം വലിച്ചെറിഞ്ഞു. കോയമ്പത്തൂർ നഗരത്തിലെ അവിനാശി റോഡിൽ ചിന്നിയംപാളയത്ത് തിങ്കളാഴ്‌ച പുലർച്ചെയാണ് സംഭവം. റോഡിൽ വീണ മൃതദേഹത്തിൽ ഉടൻ തന്നെ നിരവധി വാഹനങ്ങൾ കയറിയിറങ്ങിയതിനാൽ ആളെ തിരിച്ചറിയാനായില്ലെന്ന് പൊലീസ് അറിയിച്ചു.പൊലീസ് ഇൻസ്‌പെക്‌ടർ മുത്തുമണിയും സംഘവും ഉടൻ സ്ഥലത്തെത്തി മൃതദേഹം കോയമ്പത്തൂർ മെഡിക്കൽ കൊളേജിലേക്ക് മാറ്റി. തലയും മുഖവും വാഹനമിടിച്ച് തകർന്നതിനാൽ ആളെ തിരിച്ചറിയാൻ കഴിഞ്ഞില്ല. അർദ്ധനഗ്നയായ നിലയിലായിരുന്നു മൃതദേഹം.റോഡ് മുറിച്ചുകടക്കവെ വാഹനം ഇടിച്ച് മരിച്ചതാകാമെന്ന് പൊലീസ് കരുതിയെങ്കിലും സ്ഥലത്തെ സിസിടിവി ക്യാമറ പരിശോധനയിലാണ് എസ്യുവി കാറിൽ നിന്ന് മൃതദേഹം വലിച്ചെറിഞ്ഞതായി കണ്ടത്. സംഭവം കൊലപാതകമാണെന്നാണ് പൊലീസ് നിഗമനം. മറ്റ് വിവരങ്ങൾ പോസ്‌റ്റ്മോർട്ടത്തിന് ശേഷം ലഭ്യമാകുമെന്ന് പൊലീസ് അറിയിച്ചു.
