കഞ്ചാവും നാടന്‍ തോക്കും പിടികൂടി; യുവാവ്‌ അറസ്‌റ്റില്‍
അടിമാലി: നാര്‍ക്കോട്ടിക്‌ സംഘത്തിന്റെ പരിശോധനയില്‍ കഞ്ചാവും നാടന്‍ തോക്കും പിടികൂടി. കഞ്ചാവ്‌ കൈവശം സൂക്ഷിച്ച കേസില്‍ യുവാവിനെ അറസ്‌റ്റ്‌ ചെയ്‌തു.
വെള്ളത്തൂവല്‍ ശല്യാംപാറ അറയില്‍ ദിലീപ്‌ ശ്രീധരനാ(45)ണ്‌ അറസ്‌റ്റിലായത്‌. ഇയാളില്‍ നിന്നും 10 ഗ്രാം കഞ്ചാവാണ്‌ കണ്ടെടുത്തത്‌. തുടര്‍ന്ന്‌ നടന്ന അന്വേഷണത്തിലാണ്‌ ഇയാളുടെ വീടിനു സമീപം പാറയിടുക്കില്‍ നിന്നും നാടന്‍ തോക്ക്‌ കണ്ടെടുത്തത്‌.
നാര്‍കോട്ടിക്‌ എന്‍ഫോഴ്‌സ്‌മെന്റ്‌ സ്‌ക്വാഡ്‌ സര്‍ക്കിള്‍ ഇന്‍സ്‌പെക്‌ടര്‍ എം.കെ. പ്രസാദിന്റെ നേതൃത്വത്തില്‍ നടത്തിയ റെയ്‌ഡിലാണ്‌ സംഭവം. വീടിന്റെ 25 മീറ്റര്‍ വടക്ക്‌ പടിഞ്ഞാറു ഭാഗത്തുള്ള പാറയുടെ അടിയില്‍ നിന്നും ഒളിപ്പിച്ച നിലയിലായിരുന്നു നാടന്‍ തോക്കു കണ്ടെടുത്തത്‌. തോക്ക്‌ വെള്ളത്തൂവല്‍ പോലീസ്‌ സ്‌റ്റേഷനിലേക്ക്‌ കൈമാറി.
തോക്കിന്റെ ഉടമയെ കണ്ടെത്താന്‍ പോലീസ്‌ അന്വേഷണം ആരംഭിച്ചിട്ടുണ്ട്‌. റെയ്‌ഡില്‍ പ്രിവന്റീവ്‌ ഓഫീസര്‍ ടി.വി. സതീഷ്‌, ഗ്രേഡ്‌ പ്രിവേന്റീവ്‌ ഓഫീസര്‍മാരായ സാന്റി തോമസ്‌, വി.ആര്‍. ഷാജി, ഡ്രൈവര്‍ പി.വി. നാസര്‍ എന്നിവരും പങ്കെടുത്തു.
കഞ്ചാവ്‌ കൈവശം വെച്ച കുറ്റത്തിന്‌ അറസ്‌റ്റ്‌ ചെയ്‌ത യുവാവിനെ കേസ് റെക്കോര്‍ഡുകളും തൊണ്ടിമുതലുകളും അടക്കം എക്‌സൈസ്‌ റേഞ്ച്‌ ഓഫീസിന്‌ കൈമാറി. പിന്നീട്‌ ഇയാളെ ജാമ്യത്തില്‍ വിട്ടയച്ചതായി ഉദ്യോഗസ്‌ഥര്‍ പറഞ്ഞു.
