ന്യൂദല്‍ഹി: അയോധ്യ സുപ്രീം കോടതി വിധിക്കെതിരെ പുനഃപരിശോധനാ ഹരജി നല്‍കാനുള്ള തീരുമാനത്തെ പിന്തുണക്കുന്നതായി മുസ്ലീം ലീഗ്.
പള്ളിക്കായി പകരം നല്‍കിയ ഭൂമി സ്വീകരിക്കണമോ എന്ന കാര്യത്തില്‍ കോണ്‍ഗ്രസ് അടക്കമുള്ള പ്രതിപക്ഷ പാര്‍ട്ടികളുമായി ചര്‍ച്ച ചെയ്ത് തീരുമാനമെടുക്കുമെന്നും ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലികുട്ടി എം.പി പറഞ്ഞു.
അതേസമയം സുപ്രീംകോടതി വിധിയെ ബഹുമാനിക്കുന്നുവെന്നും എന്നാല്‍ പുനഃപരിശോധനാ ഹരജി നല്‍കുകയെന്നത് നിയമപരമായ അവസരമാണെന്നും കുഞ്ഞാലികുട്ടി പറഞ്ഞു.
മുസ്ലീം വ്യക്തി നിയമ ബോര്‍ഡും ജമിയത്ത് ഉലമ ഐ ഹിന്ദ് എന്ന് സംഘടനയുമാണ് പുനഃപരിശോധനാ ഹരജി നല്‍കാന്‍ തീരുമാനിച്ചത്.അയോദ്ധ്യ വിധി വന്ന ശേഷം ഇതിനോട് പ്രതികരിക്കാനറിയാതെ ലീഗ് നേതൃത്വം കുഴങ്ങിയിരുന്നു.ഇത് പാർട്ടി അണികൾക്കിടയിൽ വ്യാപക പ്രതിഷേധത്തിനിടയാക്കി.അതിനിടെ മുസ്ലിം തീവ്ര സംഘടനകൾ വിഷയത്തിൽ മുതലെടുപ്പിനുമിറങ്ങി.ഇതാണ് ലീഗിനെ മനംമാറ്റത്തിന് പ്രേരിപ്പിച്ചത്.അതേസമയം കോൺഗ്രസ്സിന്റെ മൃദു ഹിന്ദുത്വ നയം ലീഗിന് അലോസരമായി തുടരുന്നുണ്ട്.
