‘രോഗം’ ബിജെപിയെ കീഴടക്കിക്കഴിഞ്ഞു,ഉടൻ ശസ്ത്രക്രിയ വേണം-
മാതൃഭൂമി ന്യൂസിനോട് പി.പി.മുകുന്ദന്
കണ്ണൂര്: തിരഞ്ഞെടുപ്പിനുശേഷം സംസ്ഥാനത്ത് ബി.ജെ.പി.യുടെ പ്രതിച്ഛായ പൂര്ണമായും നഷ്ടപ്പെട്ടെന്ന് മുതിര്ന്ന നേതാവും പാര്ട്ടി മുന് സംസ്ഥാന ജനറല് സെക്രട്ടറിയുമായ പി.പി.മുകുന്ദന് പറഞ്ഞു. കുഴല്പ്പണ ആരോപണത്തില് സംസ്ഥാന അധ്യക്ഷന് കെ സുരേന്ദ്രന് മറുപടി പറയണം. സംസ്ഥാനത്തെ ബിജെപിയില് നേതൃത്വമാറ്റം വേണമെന്നും അദ്ദേഹം ആവശ്യപ്പെട്ടു.
35 സീറ്റ് കിട്ടിയാല് ഭരണം പിടിക്കുമെന്നും ലീഗിനെ ക്ഷണിക്കുകയുമൊക്കെ ചെയ്ത നേതൃത്വത്തിന്റെ പ്രസ്താവനകള് അണികളെ ആശയക്കുഴപ്പത്തിലാക്കി. തിരഞ്ഞെടുപ്പില് ഒരു സീറ്റുപോലും കിട്ടാത്ത സ്ഥിതിയുമുണ്ടായെന്നും മുകുന്ദന് വ്യക്തമാക്കി. കണ്ണൂരില് മാതൃഭൂമി ന്യൂസിന് അനുവദിച്ച പ്രത്യേക അഭിമുഖത്തില് സംസാരിക്കുകയായിരുന്നു അദ്ദേഹം.
‘ഈ പോക്ക് എങ്ങോട്ട്’ എന്ന് ഞാന് ഇതേക്കുറിച്ച് നേരത്തേ ഫെയ്സ്ബുക്ക് പോസ്റ്റ് ഇട്ടിരുന്നു. ആദര്ശത്തോടെ പാര്ട്ടിയില് പ്രവര്ത്തിച്ച പലരും ഇപ്പോള് മാറിനില്ക്കുകയാണ്. കെ.സുരേന്ദ്രന് പ്രസിഡന്റായശേഷം കണ്ണൂരില് വന്നപ്പോള് എന്നെ വിളിച്ചിരുന്നു. പിന്നീട് വിളിച്ചിട്ടില്ല. എന്നെ ബ്ലോക്ക് ആക്കിയിരിക്കാം. ഇപ്പോള് പാര്ട്ടിയുടെ അവസ്ഥ ശ്രീധരന്പിള്ളയുടെ കാലത്തേക്ക് പോയിരിക്കുന്നു. താഴേത്തട്ടില് ചര്ച്ച വേണമെന്ന എന്റെ ആവശ്യം പരിഗണിക്കപ്പെട്ടില്ല.
ഇപ്പോള് പുറത്തുവന്ന ഫോണ് സംഭാഷണത്തിലെ ശബ്ദരേഖ സുരേന്ദ്രന്റേത് തന്നെയാണ്. അതൊരു കെണിയായിരുന്നുവെന്ന് മനസിലാക്കാന് കഴിയാതെ പോയത് സുരേന്ദ്രന്റെ ജാഗ്രതക്കുറവാണ്. ഇക്കാര്യത്തില് സുരേന്ദ്രന് മറുപടി പറയണം. കുഴല്പ്പണ ഇടപാടില് ബിജെപി നേതൃത്വം പറയുന്ന കാര്യങ്ങളില് വൈരുദ്ധ്യമുണ്ട്.
പണ്ട് ബി.ജെ.പി.യില് തിരഞ്ഞെടുപ്പ് ഫണ്ട് കൈകാര്യം ചെയ്യാന് ഒരു ഫിനാന്സ് കമ്മിറ്റിയുണ്ടായിരുന്നു. ഇപ്പോള് അതുണ്ടോ. കൊടകര സംഭവം പാര്ട്ടിക്ക് ആകെ നാണക്കേടുണ്ടാക്കി. ഇത് മാറ്റിയെടുക്കണം. പരിവാര സംഘടനകളെയും ഇത് ബാധിച്ചു. പ്രവര്ത്തകരുടെ വിഷമം മാറ്റിയെടുക്കാന് നേതൃത്വത്തിന് കഴിയണം -അദ്ദേഹം അഭിപ്രായപ്പെട്ടു.
ഇതൊരു രോഗമാണ് ഈ രോഗം ബിജെപിയെ ബാധിച്ചുകഴിഞ്ഞു. ഇനി ചികിത്സ വൈകരുത് ഒരു ശസ്ത്രക്രിയ തന്നെ വേണ്ടിവരും എന്നാണ് പാര്ട്ടിയുടെ അവസ്ഥയെക്കുറിച്ചുള്ള പി.പി.മുകുന്ദന്റെ പ്രതികരണം. ഇത്തരത്തില് ഇനി സംഘടനയെ മുന്നോട്ട് കൊണ്ടുപോകാനാകില്ല. രണ്ടടി മുന്നോട്ട് കൊണ്ടുപോകുമ്പോള് ഒരടി പിന്നോട്ടുവരുന്ന അവസ്ഥയാണ് പാര്ട്ടിയുടേത്. ഇത് സംഘടനയെ അടിമുടി ബാധിച്ചുകഴിഞ്ഞു. സംസ്ഥാനത്തെ ബിജെപിയില് നേതൃത്വമാറ്റം അനിവാര്യമാണ്. അതെങ്ങനെ വേണമെന്ന് ദേശീയ നേതൃത്വം തീരുമാനിക്കണം. ഇല്ലയെങ്കില് സംസ്ഥാനത്തെ ബിജെപിയുടെ രാഷ്ട്രീയ പ്രസക്തി തന്നെ നഷ്ടപ്പെടും .
ഇപ്പോഴുണ്ടായ സംഭവങ്ങള് ഉള്പ്പെടെ കേന്ദ്ര നേതൃത്വത്തിനറിയാം. ഇക്കാര്യങ്ങളെക്കുറിച്ച് അന്വേഷണവും ആരംഭിച്ചു കഴിഞ്ഞു. ചില കാര്യങ്ങളില് വിശദീകരണങ്ങള് തേടാനായി തന്നെ കേന്ദ്ര നേതൃത്വം ബന്ധപ്പെട്ടിരുന്നു.
ആര്എസ്എസില് നിന്നും പാര്ട്ടിയ്ക്ക് ഉപദേശങ്ങള് നല്കാനായി ഒരു പ്രഭാരിയെ നിയോഗിച്ചിട്ടുണ്ട്. ഇദ്ദേഹം കേരളത്തില് നിന്നുള്ളയാളല്ല. ഇവിടുത്ത് സാഹചര്യങ്ങള് അറിയില്ല. ഇപ്പോഴുണ്ടായ വിഷയങ്ങളില് അദ്ദേഹം മൗനം പാലിക്കുകയാണ്. ഇടപെടുകയും നിര്ദ്ദേശങ്ങള് നല്കുകയും ചെയ്തിരുന്നുവെങ്കില് കേരളത്തിലെ പാര്ട്ടിയ്ക്ക് ഈ സ്ഥിതിയുണ്ടാകുമായിരുന്നില്ല – പി.പി.മുകുന്ദന് വ്യക്തമാക്കി