മലപ്പുറം: മകനെതിരെ സമൂഹമാധ്യമങ്ങളിൽ ഉയരുന്ന ഭീഷണികൾക്ക് മറുപടിയുമായി വനിതാ ലീഗ് സംസ്ഥാന അധ്യക്ഷ സുഹ്റ മമ്പാട്. ലീഗ് പ്രവർത്തകനായ മകൻ നിയാസിനെതിരെ എൽഡിഎഫ് അനുകൂലി നടത്തിയ പ്രതികരണവും മകന്റെ ഫോട്ടോയും ചേർത്താണ് സുഹ്റ പ്രതികരിച്ചിരിക്കുന്നത്. പാർട്ടി ഓഫീസിനെതിരെ കല്ലെറിഞ്ഞിരുന്നെങ്കിൽ നിയാസിനെ കൊലപ്പെടുത്തിയേനെ എന്ന് പരോക്ഷമായി പറയുന്ന കമന്റാണ് സുഹ്റ പോസ്റ്റ് ചെയ്തിരിക്കുന്നത്.
“അതിനുമാത്രം പോന്നോനൊക്കെ ചങ്ങരംകുളത്ത്‌ സഖാവായി ഉണ്ടോടാ? നിയാസിനെ മൂക്കിൽ വലിച്ച്‌ കയറ്റിക്കളയുമെന്ന് ചങ്ങരംകുളത്തെ സൈബർ സഖക്കൾ പലരും സോഷ്യൽ മീഡിയയിൽ വല്ലാതെ കുരക്കുന്നു. ഈ മുഷ്ടി ചുരുട്ടാൻ പഠിപ്പിച്ചത്‌ ഞാനാണെങ്കിൽ അതിനിയും ഉയർന്നു പൊങ്ങും.” എന്നാണ് മകന്റെ ചിത്രം പോസ്റ്റ് ചെയ്തുകൊണ്ട് സുഹ്റ പ്രതികരിച്ചിരിക്കുന്നത്.
അതേസമയം, നിയമസഭാ തെരഞ്ഞെടുപ്പിനു പിന്നാലെ സംസ്ഥാനത്ത് അക്രമ സംഭവങ്ങൾ തുടർച്ചയായി റിപ്പോർട്ട് ചെയ്തുകൊണ്ടിരിക്കുകയാണ്. പാനൂരിൽ കൊല്ലപ്പെട്ട മുസ്ലീം ലീഗ് പ്രവര്‍ത്തകൻ്റെ സംസ്കാരച്ചടങ്ങുകള്‍ക്ക് മുൻപ് പ്രദേശത്ത് വ്യാപകമായി സിപിഎം ഓഫീസുകള്‍ ആക്രമിക്കപ്പെട്ടിരുന്നു. ഇതിനു പിന്നാലെ കളക്ടർ വിളിച്ചു ചേർത്ത സമാധാന യോഗം യുഡിഎഫ് ബഹിഷ്കരിച്ചു.
