ചതുർമുഖത്തിലെ ആ ‘നാലാമൻ’ ആര്? പ്രേക്ഷകർ കാത്തിരുന്ന ആ രഹസ്യം വെളിപ്പെടുത്തി അണിയറപ്രവർത്തകർ
ടെക്‌നോഹൊറര്‍ വിഭാഗത്തില്‍ ഒരുങ്ങുന്ന ചലച്ചിത്രം, ‘ചതുര്‍ മുഖത്തിന്റെ ‘ ടൈറ്റില്‍ സൂചിപ്പിക്കുന്ന നാലാമത്തെ മുഖം എന്താണെന്ന് വെളിപ്പെടുത്തി അണിയറപ്രവര്‍ത്തകര്‍. ഒരു സ്മാര്‍ട്ട് ഫോണ്‍ ആണ് നാലാം സാന്നിദ്ധ്യമെന്ന് മഞ്ജു വാരിയറും സണ്ണി വെയ്‌നും എറണാകുളത്തു വെച്ചു നടന്ന പത്ര സമ്മേളനത്തില്‍ വെളിപ്പെടുത്തി.
മഞ്ജുവാര്യരും, സണ്ണി വെയിനും, അലന്‍സിയറും അവതരിപ്പിക്കുന്ന മൂന്നു കഥാപാത്രങ്ങളെ കൂടാതെ സിനിമയിലെ നാലാമത്തെ മുഖമാരാണെന്നുള്ള പ്രേക്ഷകരുടെ സംശയത്തിനു വിരാമം ഇട്ടു കൊണ്ടാണ് ഇതിനുള്ള ഉത്തരവുമായ് മഞ്ജു വാര്യരും സണ്ണി വെയിനും എത്തിയത്. ഒരു സ്മാര്‍ട്ട് ഫോണിനൊപ്പം നില്‍ക്കുന്ന കഥാപാത്രങ്ങളുടെ സ്പൂക്കി മോഷന്‍ പോസ്റ്ററും, സിനിമയ്ക്കു വേണ്ടി ഒരുക്കിയ കൗതുകരമായ റിങ്ങ്‌ടോണും ഇരുവരും അനാവരണം ചെയ്തു.
രഞ്ജിത്ത് കമല ശങ്കറും, സലീല്‍ വിയും ഒപ്പോപ്പം നിന്ന് സംവിധാനം ചെയ്യുന്ന ചിത്രത്തിന്റെ നിര്‍മ്മാണം ജിസ് ടോംസ് മൂവിയുടെ ബാനറില്‍ മഞ്ജു വാര്യര്‍ പ്രൊഡക്ഷന്‍സുമായി ചേര്‍ന്ന് ജിസ് ടോംസും, ജസ്റ്റിന്‍ തോമസും ചേര്‍ന്ന് കൈകാര്യം ചെയ്തിരിക്കുന്നു.അഭയകുമാര്‍ കെ, അനില്‍ കുര്യന്‍ എന്നിവരാണ് ഏറെ പ്രത്യേകതകള്‍ ഉള്ള സിനിമയുടെ കഥ, തിരക്കഥ, സംഭാഷണം എന്നിവ രചിച്ചിരിക്കുന്നത്.
കഥയിലും അവതരണ മികവിലും വളരെ സങ്കീര്‍ണ്ണതകളും, കൗതുകവും നിറഞ്ഞ ഒരു ആശയം കൈകാര്യം ചെയ്യുന്ന ചതുര്‍ മുഖം ടെക്‌നോഹൊറര്‍ വിഭാഗത്തിലുള്ള ചലച്ചിത്രം ആണ്. മഞ്ജു വാരിയര്‍, സണ്ണി വെയിന്‍ എന്നിവരെ കൂടാതെ, ശക്തമായ ഒരു താരനിരയും, അണിയറപ്രവര്‍ത്തകരും ചതുര്‍ മുഖത്തില്‍ ഉണ്ട്.
ണയണ്‍, ആമേന്‍, കുരുതി എന്നീ ചിത്രങ്ങളിലൂടെ മലയാളികള്‍ക്ക് സുപരിചിതന്‍ ആയ പ്രശസ്ത ഛായാഗ്രാഹകന്‍ അഭിനന്ദന്‍ രാമാനുജമാണ് ചതുര്‍മുഖത്തിന്റെ ഛായാഗ്രഹണം നിര്‍വ്വഹിചിരിക്കുന്നത്.ആമേന്‍, ആക്ഷന്‍ ഹീറോ ബിജു എന്നീ സിനിമയുടെ എഡിറ്റര്‍ ആയ മനോജാണ് ചതുര്‍മുഖത്തിന്റെ എഡിറ്റിംഗ് കൈക്കാര്യം ചെയ്തിരിക്കുന്നത്.
സൗണ്ട് മിക്‌സിങ് വിഷ്ണു ഗോവിന്ദ്, ചിത്രത്തിന്റെ വി. എഫ്. എക്‌സ് ഏജന്‍സിയായ പ്രോമിസാണ് ആകാംഷ ഉണര്‍ത്തുന്ന മോഷന്‍ പോസ്റ്റര്‍ ചെയ്തിരിക്കുന്നത്. ചിത്രത്തിന്റെ എക്‌സിക്യൂട്ടീവ് പ്രൊഡ്യൂസറായ ബിനീഷ് ചന്ദ്രനോടൊപ്പം കോപ്രൊഡ്യൂസറായി ബിജു ജോര്‍ജ്ജും ചതുര്‍ മുഖത്തില്‍ പ്രവര്‍ത്തിക്കുന്നു.
ഗാനരചയിതാവ് മനു മഞ്ജിത്ത്, സംഗീത സംവിധാനവും, സൗണ്ടും കൈകാര്യം ചെയ്തിരിക്കുന്നത് ഡോണ്‍ വിന്‍സെന്റാണ്, വസ്ത്രാലങ്കാരം സമീറ സനീഷ്.സെഞ്ച്വറി ഫിലിംസാണ് ഈ ചിത്രത്തിന്റെ വിതരണം നിര്‍വ്വഹിക്കുന്നത്. ചിത്രം ഇപ്പോള്‍ അതിന്റെ പോസ്റ്റ്‌പ്രൊഡക്ഷന്‍ ഘട്ടത്തിലാണ്. ചിത്രം ഉടന്‍ തന്നെ കാണികള്‍ക്ക് നൂതന ദൃശ്യാനുഭവവുമായി സിനിമാ സ്‌ക്രീനുകളില്‍ എത്തും എന്നാണ് അണിയറപ്രവര്‍ത്തകര്‍ നല്‍കുന്ന വിവരം.
