വ്യാജ ഡോക്ടർ സോഫിമോൾക്കെതിരെ മുൻപും പരാതി നൽകി രു ന്നു. പോലീസ് നടപടിയെടുത്തില്ലെന്ന് ആക്ഷേപം.
കണ്ണൂർ:കഴിഞ്ഞദിവസം പാലോട് പോലീസ് അറസ്റ്റ് ചെയ്ത വ്യാജ ഡോക്ടർ പെരിങ്ങമല ഹിസാന മൻസിലിൽ സോഫിമോൾക്കെതിരെ (43) നേരത്തേ പരാതി ഉയർന്നിട്ടും പൊലീസ് അന്വേഷിച്ചില്ലെ ന്ന് ആക്ഷേപം.
തലശ്ശേരി കീർത്തി ഹോസ്പിറ്റലിൽ കുറച്ചുനാൾ പ്രവർത്തിച്ചിരുന്ന ഇവരുടെ യോഗ്യതയിൽ സംശയം തോന്നിയപ്പോൾ സേവനം അവസാനിപ്പിച്ചുവെന്നും പൊലീസിൽ പരാതി നൽകിയെന്നും ആശുപത്രി അധികൃതർ അറിയിച്ചു.
എന്നാൽ, പൊലീസ് കാര്യമായെടുത്ത് അന്വേഷണം നടത്തിയില്ലെന്നും ആശുപത്രി അധികൃതർ പറഞ്ഞു. ഒടുവിൽ പാലോട് പൊലീസിന് ലഭിച്ച പരാതിയിലാണ് വ്യാജ ഡോക്ടർ കഴിഞ്ഞ ദിവസം അറസ്റ്റിലായത്.
മാറാരോഗങ്ങൾ മാറ്റുമെന്നു സോഷ്യൽ മീഡിയ വഴി പ്രചാരണം നൽകി കേരളത്തിന്റെ വിവിധ ഭാഗങ്ങളിൽ ക്യാംപ് ചെയ്തു വ്യാജ ചികിത്സ നടത്തി വരികയായിരുന്നു ഇവർ ‘
പെരിങ്ങമ്മല കൊല്ലായിൽ ഡീസന്റ് മുക്കിനു സമീപം ഹിസാന മൻസിലിൽ സോഫി മോൾ (43) ഡീസന്റ് മുക്കിൽ ചികിത്സ നടത്തവേയാണു പിടിയിലായത്. പൊലീസ് എത്തുന്ന സമയത്തും വിവിധ സ്ഥലങ്ങളിലെ നിരവധി പേർ ചികിത്സാ കേന്ദ്രത്തിൽ ഉണ്ടായിരുന്നു.
പെരിങ്ങമ്മല സ്വദേശിയാണെങ്കിലും ഇവർ വർഷങ്ങളായി കാസർകോട് നീലേശ്വരം മടിക്കൈ എന്ന സ്ഥലത്താണു താമസം. മലപ്പുറം, കൊണ്ടോട്ടി, തലശ്ശേരി കോട്ടയം തുടങ്ങിയ സ്ഥലങ്ങളിലും ഇപ്പോൾ ചികിത്സ നടത്തി വരുന്നതായും നേരത്തെ ഭർത്താവിനൊപ്പം ചികിത്സ നടത്തിയിരുന്ന ഇവർ ഇപ്പോൾ പിണങ്ങി ഒറ്റയ്ക്കാണു ചികിത്സ നടത്തി വരുന്നതെന്നും പൊലീസ് കണ്ടെത്തി. വൈദ്യ ഫിയ റാവുത്തർ തലശ്ശേരി എന്ന ഫെയ്സ്ബുക് അക്കൗണ്ട് മുഖേനയാണു ഇവർ ചികിത്സയ്ക്കു പ്രചാരണം നൽകുന്നത്.
മരുന്ന് നൽകാനുള്ള തമിഴ്നാട്ടിലെ ഒരു സ്ഥാപനത്തിൽ നിന്നുള്ള സർട്ടിഫിക്കറ്റും ഇന്ത്യൻ മാർഷൽ ആർട്സ് അക്കാദമിയുടെ കളരി മർമ ഗുരുകുലത്തിന്റെ സർട്ടിഫിക്കറ്റും ഉപയോഗിച്ചാണു പത്താം ക്ലാസ് വിദ്യാഭ്യാസം മാത്രമുളള സോഫിയ സർജറി അടക്കം നടത്തിവന്നത്. ഇത്തരം ചികിത്സയ്ക്കായി അമിതമായി ഫീസും ഈടാക്കിയിരുന്നു. ഇവരിൽ നിന്ന് ഡോ. സോഫിമോൾ എന്ന തിരിച്ചറിയൽ കാർഡ് പിടിച്ചെടുത്തു.
ഫെയ്സ് ബുക്കിലെ പരസ്യം കണ്ടു തിരുവനന്തപുരം റൂറൽ ജില്ലാ പൊലീസ് മേധാവി പി.കെ. മധുവിന്റെ നിർദേശപ്രകാരം നെടുമങ്ങാട് ഡിവൈഎസ്പി ജെ. ഉമേഷ്, പാലോട് ഇൻസ്പെക്ടർ സി.കെ. മനോജ് എന്നിവരുടെ നേതൃത്വത്തിൽ നടന്ന അന്വേഷണത്തിലാണ് വ്യാജഡോക്ടർ എന്നു കണ്ടെത്തി അറസ്റ്റ് ചെയ്തത്. പ്രതിയെ കോടതി റിമാൻഡ് ചെയ്തു.
