യു. ഡി. എഫ് സ്ഥാനാര്‍ത്ഥി പി. വി സുരേഷ് തലശ്ശേരി ബിഷപ്പ് ഹൗസിലെത്തി അനുഗ്രഹം തേടി
കാഞ്ഞങ്ങാട്‌:യു. ഡി. എഫ് സ്ഥാനാർത്ഥി പി. വി സുരേഷ് ബുധനാഴ്ച രാവിലെ തലശ്ശേരി ബിഷപ്പ് ഹൗസിലെത്തി പിതാക്കന്മാരുടെ അനുഗ്രഹം തേടി. തലശ്ശേരി അതിരൂപത മെത്രാപ്പോലീത്ത മാർ ജോർജ് ഞരളക്കാട്ട്, സഹായമെത്രാൻ മാർ ജോസഫ് പാംപ്ലാനി എന്നിവരെ കണ്ടു രാജ്മോഹൻ ഉണ്ണിത്താൻ എം.പിക്കൊപ്പമാണ് ബിഷപ്പ് ഹൗസിലെത്തിയത്. കോട്ടയം അതിരൂപത സഹായ മെത്രാൻ മാർ ജോസഫ് പണ്ടാരശേരിൽ, കണ്ണൂർ രൂപത ബിഷപ് അലക്സ്‌ വടക്കുംതല എന്നിവരെയും കണ്ട് അനുഗ്രഹം വാങ്ങി.
ഉച്ചയോടെ ഒടയംചാലിലെത്തി കോടോം-ബേളൂർ മണ്ഡലം കോൺഗ്രസ് കമ്മിറ്റി യോഗത്തിൽ പങ്കെടുത്തു. പിന്നീട് ടൗണിലെ വ്യാപാരസ്ഥാപനങ്ങളിലെത്തി വോട്ടഭ്യർത്ഥിച്ചു. ടൗണിലെ യാത്രക്കാരെയും ഓട്ടോഡ്രൈവർമാരെയും കണ്ടു. കോട്ടച്ചേരി കോ-ഓപ്പറേറ്റീവ് മാർക്കറ്റിങ് സൊസൈറ്റി റിട്ട സെക്രട്ടറി യു കുഞ്ഞമ്പു നായരുടെ വീട്ടിലെത്തി വോട്ട് ചോദിച്ചു. പിന്നീട് മുതിർന്ന പാർട്ടി പ്രവർത്തകരെയും കണ്ടു. പിന്നീട് ചുള്ളിക്കരയിലെത്തി. മുതിർന്ന ജനപ്രതിനിധികളെയും നേതാക്കളെ കണ്ടു. മഹിളാ കോൺഗ്രസ് സംസ്ഥാന ജനറൽ സെക്രട്ടറി മീനാക്ഷി ബാലകൃഷ്ണൻ, യുത്ത് കോൺഗ്രസ് ജില്ലാ പ്രസിഡണ്ട് ബി പി.പ്രദീപ് കുമാർ , ബളാൽ ബ്ലോക്ക് കോൺഗ്രസ് പ്രസിഡണ്ട് കെ. കരുണാകരൻ നായർ, മണ്ഡലം കോൺഗ്രസ് പ്രസിഡൻ്റ് പി.ബാലചന്ദ്രൻ, എ. കുഞ്ഞിരാമൻ തുടങ്ങിയവരും ഉണ്ടായിരുന്നു.
