ഇഡിയുമായി ഏറ്റുമുട്ടാനൊരുങ്ങി കിഫ്ബി; ഡെ. മാനേജിങ് ഡയറക്ടര്‍ ഇന്ന് ഹാജരാകില്ല
കൊച്ചി :കേന്ദ്രാനുമതിയില്ലാതെ വിദേശ നിക്ഷേപം സ്വീകരിച്ചെന്ന കേസില്‍ ചോദ്യം ചെയ്യലിന് കിഫ്ബി ഡെപ്യൂട്ടി മാനേജിങ് ഡയറക്ടര്‍ വിക്രംജിത് സിങ് ഇന്ന് എന്‍ഫോഴ്‌സ്‌മെന്റ് ഡയറക്ടറേറ്റിനു മുമ്പാകെ ഹാജരാകില്ല. ഇതുകാണിച്ച് കിഫ്ബി ഇഡിക്ക് കത്തു നല്‍കി. തിരഞ്ഞെടുപ്പു പെരുമാറ്റച്ചട്ടം നിലനില്‍ക്കുന്നതിനാല്‍ ഇത്തരത്തില്‍ വിളിച്ചു വരുത്താനാവില്ലെന്നു ചൂണ്ടിക്കാണിച്ചാണ് കത്തു നല്‍കിയിരിക്കുന്നത്. നേരത്തെ കിഫ്ബി ഇടപാടുകള്‍ സംബന്ധിച്ച് ഇഡിക്ക് വിവരങ്ങള്‍ നല്‍കിയിരുന്നതാണ്. കൂടുതലായി എന്തു വിവരമാണ് ആവശ്യമെന്നു അറിയിച്ചാല്‍ നല്‍കുമെന്നും അറിയിച്ചിട്ടുണ്ട്.
കിഫ്ബിയുടെ തലപ്പത്തുള്ള ഐഎഎസ് ഉദ്യോഗസ്ഥരെ നോട്ടിസ് നല്‍കി ചോദ്യം ചെയ്യേണ്ട സാഹചര്യമില്ലെന്ന നിലപാടാണ് നിലവില്‍ കിഫ്ബി സ്വീകരിച്ചിരിക്കുന്നത്. കേസ് രാഷ്ട്രീയ പ്രേരിതമാണെന്നും സര്‍ക്കാരിന്റെ വികസന പ്രവര്‍ത്തനങ്ങള്‍ തകര്‍ക്കാനുള്ള നീക്കമാണെന്നും കഴിഞ്ഞ ദിവസം തോമസ് ഐസക് പ്രതികരിച്ചിരുന്നു. തൊട്ടുപിന്നാലെ ഇവ ചൂണ്ടിക്കാണിച്ച് തിരഞ്ഞെടുപ്പു കമ്മിഷന് പരാതി നല്‍കുമെന്നു മുഖ്യമന്ത്രിയും അറിയിച്ചിട്ടുണ്ട്. ഈ സാഹചര്യത്തിലാണ് ഡപ്യൂട്ടി എംഡി ഇന്ന് ഹാജരാകുന്നില്ലെന്ന് അറിയിച്ചിരിക്കുന്നത്. കിഫ്ബി എംഡി കെ.എം. ഏബ്രഹാമിനോട് നാളെ ഹാജരാകാനാണ് ആവശ്യപ്പെട്ടിരിക്കുന്നത്. അദ്ദേഹവും ചോദ്യം ചെയ്യലിന് ഹാജരാകാന്‍ സാധ്യതയില്ലെന്നാണ് അറിയുന്നത്.
കിഫ്ബിയുടെ മസാല ബോണ്ട് നിക്ഷേപ സമാഹരണം വിദേശ വിനിമയ ചട്ടം(ഫെമ) ലംഘിച്ചെന്നുള്ള സിഎജി റിപ്പോര്‍ട്ടിനെ തുടര്‍ന്നാണ് ഇഡി അന്വേഷണം തുടങ്ങിയത്. ഇതിന്റെ ഭാഗമായി കഴിഞ്ഞ മാസം ഇഡി കിഫ്ബിയുടെ ഇതര ഉദ്യോഗസ്ഥരില്‍ നിന്ന് തെളിവെടുപ്പു നടത്തിയിരുന്നു. തുടര്‍ന്നാണ് സിഇഒ, ഡെപ്യൂട്ടി മാനേജിങ് ഡയറക്ടര്‍ തുടങ്ങിയവരെ ചോദ്യം ചെയ്യലിനു വിളിപ്പിച്ചിരിക്കുന്നത്.
