ഷാജിക്കെതിരെ കാസർകോട് ലീഗിൽ പടയൊരുക്കം,ജില്ലാ നേതൃത്വത്തിന് കടുത്ത അതൃപ്തി,പരസ്യമായി പ്രതികരിക്കേണ്ടിവരുമെന്ന് നേതാക്കൾ.
കാസര്‍കോട്: ജില്ലാ ആസ്ഥാന നിയോജക മണ്ഡലത്തില്‍ കെ.എം.ഷാജി മല്‍സരിക്കാന്‍ വരുന്നതിനെതിരെ ജില്ലാ മുസ്ലിം ലീഗിലെ പ്രബലവിഭാഗം നേതാക്കള്‍ രംഗത്ത്. ഷാജിക്ക് ഉറച്ച സീറ്റെന്ന നിലയില്‍ കാസര്‍കോട് മണ്ഡലം നല്‍കാനുള്ള നീക്കത്തിനെതിരെയാണ് പ്രതിഷേധം ശക്തമായിരിക്കുന്നത്.
ലീഗിന്‍റെ കൊടിക്കീഴില്‍ കുറ്റിച്ചൂലിനെ മല്‍സരിപ്പിച്ചാലും ജയിക്കുന്ന മണ്ഡലത്തില്‍ ജില്ലയ്ക്ക് പുറത്ത് നിന്ന് മറ്റൊരാളെ പരിഗണിക്കുന്നതിന് എതിരെയാണ് ജില്ലാ നേതാക്കള്‍ക്ക് ഇടയില്‍ അമര്‍ഷം പുകയുന്നത്. ഒന്നാം തീയതി എംജി റോഡിൽ സജ്ജീകരിച്ച താൽക്കാലിക മുസ്ലിം ലീഗ് ഓഫീസിൽ അർധരാത്രി വരെ യോഗം നീണ്ടുനിന്നു മുസ്ലിം ലീഗ് ജില്ലാ പ്രസിഡന്റ് ടി.ഇ.അബ്ദുല്ലയ്ക്കാണ് ആദ്യം സാധ്യത കൽപിച്ചിരുന്നതങ്കിലും. പിന്നീട് എന്‍.എ.നെല്ലിക്കുന്നിന് വീണ്ടുമൊരു അവസരം കൂടി നല്‍കണമെന്നും പാര്‍ട്ടിയിലെ ഒരുവിഭാഗം ആവശ്യപ്പെട്ടിരുന്നു. രണ്ടുതവണ വിജയിച്ച നെല്ലിക്കുന്ന് വീണ്ടും മല്‍സരിക്കുകയും യുഡിഎഫിന് ഭൂരിപക്ഷം ലഭിക്കുകയും ചെയ്താല്‍ മന്ത്രിസ്ഥാനം ലഭിക്കുമെന്നും പ്രവര്‍ത്തകര്‍ക്ക് ഇടയില്‍ അഭ്യൂഹമുണ്ടായിരുന്നു. ഇതിനിടെയാണ് കെ.എം.ഷാജിയെ കാസര്‍കോട്ടേയ്ക്ക് പരിഗണിക്കുന്നു എന്ന വാര്‍ത്ത വീണ്ടും പരന്നത്. തുടര്‍ന്ന് പാര്‍ട്ടിക്കുള്ളില്‍ ഉയര്‍ന്ന ഭിന്ന സ്വരം ഇതിനകം സംസ്ഥാന നേതൃത്വത്തെ അറിയിച്ചു കഴിഞ്ഞു. അതേസമയം അനുകൂല നിലപാട് അല്ലെങ്കിൽ പരസ്യമായി പ്രതികരിക്കേണ്ടി വരുമെന്ന് ചില നേതാക്കൾ യോഗത്തിൽ വ്യക്തമാക്കി.
