ആലപ്പുഴ മാന്നാറില്‍ നിന്ന് തട്ടിക്കൊണ്ടുപോയ യുവതിയെ വടക്കഞ്ചേരിയില്‍ നിന്ന് കണ്ടെത്തി
ആലപ്പുഴ: ആലപ്പുഴ മാന്നാറില്‍ നിന്ന് തട്ടിക്കൊണ്ടുപോയ യുവതിയെ വടക്കഞ്ചേരിയില്‍ നിന്ന് കണ്ടെത്തി. കൊരട്ടിക്കാട് സ്വദേശി ബിന്ദു(32) വിനെയാണ് തട്ടിക്കൊണ്ടു പോയ സംഘം പാലക്കാട് വടക്കഞ്ചേരിയില്‍ ഇറക്കിവിട്ടത്.
ഇന്ന് പുലര്‍ച്ചെ രണ്ട് മണിയോടെയാണ് 15 അംഗ സംഘം ബിന്ദുവിനെ തട്ടിക്കൊണ്ടുപോയത്. നാല് ദിവസം മുമ്പാണ് ബിന്ദു വിദേശത്തു നിന്ന് എത്തിയത്. സംഭവത്തില്‍ 10 പ്രതികളെ കണ്ടെത്തിയിട്ടുണ്ട്.
വീട് ആക്രമിച്ചാണ് ബിന്ദുവിനെ തട്ടിക്കൊണ്ടുപോയത്. ആക്രമണത്തില്‍ വീട്ടുകാര്‍ക്കും പരിക്കേറ്റിരുന്നു. പിന്നില്‍ സ്വര്‍ണക്കടത്ത് സംഘമെന്നാണ് സംശയിക്കുന്നത്. വീട്ടിലെത്തിയതു മുതല്‍ യുവതി സംഘത്തിന്റെ നിരീക്ഷണത്തിലായിരുന്നുവെന്നും ചിലര്‍ വീട്ടിലെത്തിയിരുന്നതായും ബന്ധുക്കള്‍ മൊഴി നല്‍കിയിട്ടുണ്ട്.
