ഡിവൈഎഫ്‌ഐ നേതാവായ ഭര്‍ത്താവിനെ കഞ്ചാവ് കേസില്‍ കുടുക്കിയതായി യുവതി; പാതിരാത്രി പൊലിസ് വീട്ടില്‍ അതിക്രമിച്ചു കയറിയതായും ആരോപണം
കുമ്പള: കഞ്ചാവ് സൂക്ഷിച്ചിട്ടുണ്ടെന്ന് പറഞ്ഞ് പാതിരാത്രി വീട്ടിലെത്തിയ പൊലിസ് വനിതാ പൊലിസിന്റെ സാന്നിധ്യമില്ലാതെ വീട്ടില്‍ അതിക്രമിച്ചു കയറിയതായി യുവതി കുമ്പള പ്രസ് ഫോറത്തില്‍ നടത്തിയ വാര്‍ത്താ സമ്മേളനത്തില്‍ ആരോപിച്ചു.വീടിനു സമീപം കഞ്ചാവ് കണ്ടെത്തിയ സംഭവത്തില്‍ ആരോപണ വിധേയനായ ഉപ്പള സോങ്കാലിലെ ഡിവൈഎഫ്‌ഐ നേതാവിന്റെ റഫീഖിന്റെ ഭാര്യ ഖൈറുന്നിസയാണ് ആരോപണവുമായി രംഗത്തെത്തിയത്.
പൊതുപ്രവര്‍ത്തകനായ തന്റെ ഭര്‍ത്താവിനെ കേസില്‍ കുടുക്കുവാനുള്ള ഗൂഡാലോചനയുടെ ഭാഗമാണ് പൊലിസ് നടത്തിയ റെയ്ഡും ഒരു പൊതി പിടിച്ചെടുത്തതെന്നും യുവതി പറഞ്ഞു.
ആദ്യമെത്തിയ പൊലിസ് സംഘം വീടിനകത്ത്ഏറെ നേരം പരിശോധിച്ചെങ്കിലും ഒന്നും കണ്ടെത്താന്‍ കഴിഞ്ഞിരുന്നില്ല. തിരിച്ചു പോയ പൊലിസ് അല്‍പ്പ നേരത്തിനു ശേഷം വീണ്ടും വന്ന് ആരോ കെണ്ടിട്ട ഒരു പൊതി ഇവിടെ നിന്നും എടുത്ത് കൊണ്ടുപോവുകയായിരുന്നുവെന്ന് ഖൈറുന്നിസ പറയുന്നു. എന്താണ് ഇവിടെ നിന്നും കിട്ടിയതെന്ന കാര്യം തങ്ങള്‍ അറിയുന്നത് തന്നെ പിറ്റേ ദിവസമാണ്.നടപടി ക്രമങ്ങളൊന്നും പാലിക്കാതെയാണ് പൊലിസ് വീട്ടില്‍ അതിക്രമിച്ചു കയറി പരിശോധിച്ചതെന്നാണ് ഖൈറുന്നിസ പറയുന്നത്.
രാഷ്ടീയ പ്രവര്‍ത്തനവും പൊതു പ്രവര്‍ത്തനവുമായി മാന്യമായ നിലയില്‍ ജീവിക്കുന്ന ഭര്‍ത്താവിനെ കള്ള കേസില്‍ കുടുക്കാന്‍ ചില രാഷ്ട്രീയ കോണില്‍ നിന്നുള്ള ഇടപെടലാണ് കഞ്ചാവ് വീടിനകത്ത് കൊണ്ടിട്ടതിനു പിന്നിലെന്ന് ഇവര്‍ ആരോപിച്ചു.പൊലിസിനെതിരെ നിയമ നടപടിയുമായി മുന്നോട്ട് പോകുമെന്ന് യുവതി വ്യക്തമാക്കി.
വാര്‍ത്താ സമ്മേളനത്തില്‍ ഉമ്മ ഷംഷാദയും ഉണ്ടായിരുന്നു.
