ഛത്തീസ്ഗഡിൽ പതിനെട്ടുകാരി ആത്മഹത്യ ചെയ്ത സംഭവത്തിൽ നിർണായക വഴിത്തിരിവ് ,പെൺകുട്ടിയെ ഏഴ് മാസത്തിനുള്ളിൽ വിറ്റത് ഏഴ് തവണ സംഭവത്തിൽ എട്ടുപേർ അറസ്റ്റിൽ
ഭോപ്പാൽ: ഛത്തീസ്ഗഡിൽ നിന്നുള്ള പതിനെട്ടുകാരി ആത്മഹത്യ ചെയ്ത സംഭവത്തിൽ നിർണായക വിവരങ്ങൾ പുറത്ത്. പെൺകുട്ടിയെ ഏഴ് മാസത്തിനുള്ളിൽ ഏഴ് തവണയാണ് വിറ്റത്. മദ്ധ്യപ്രദേശിലും ഉത്തർപ്രദേശിലുമൊക്കെയുള്ളയാളുകൾക്കാണ് കുട്ടിയെ വിറ്റത്. സംഭവത്തിൽ എട്ടുപേരെ പൊലീസ് അറസ്റ്റ് ചെയ്തു. അന്വേഷണം പുരോഗമിക്കുകയാണെന്ന് അന്വേഷണസംഘം അറിയിച്ചു.ഛത്തീസ്ഗഡിലെ ജഷ്പൂർ ജില്ലയിൽ നിന്നുള്ള പെൺകുട്ടിയെ ബന്ധുവും ഭാര്യയും ജോലി വാഗ്ദ്ധാനം ചെയ്ത് മദ്ധ്യപ്രദേശിലെ ഛത്തർപൂരിലേക്ക് കൊണ്ടുപോകുകയായിരുന്നു. ഇവർ ഛത്തർപൂരിലെ കല്ലു റായിക്വാർ എന്നയാൾക്ക് 20,000 രൂപയ്ക്ക് പെൺകുട്ടിയെ വിറ്റു. ഇയാൾ മറ്റൊരാൾക്ക് പെൺകുട്ടിയെ വിറ്റു.70,000രൂപ നൽകി ഉത്തർപ്രദേശിലെ ലളിത്പൂർ സ്വദേശിയായ സന്തോഷ് കുഷ്വയാണ് പെൺകുട്ടിയെ അവസാനമായി വാങ്ങിയത്. മാനസിക വെല്ലുവിളി നേരിടുന്ന സന്തോഷ് കുശ്വാഹയുടെ മകൻ ബാബ്‌ലൂ കുഷ്വയുമായി പെൺകുട്ടിയെ നിർബന്ധിച്ച് വിവാഹം കഴിപ്പിച്ചതായി റിപ്പോർട്ടുകളുണ്ട്.തട്ടിക്കൊണ്ടുപോയവർ മോചനദ്രവ്യം ആവശ്യപ്പെട്ട് നേരത്തെ പെൺകുട്ടിയുടെ മാതാപിതാക്കളെ ഭീഷണിപ്പെടുത്തിയിരുന്നു. തുടർന്ന് അവർ പൊലീസിൽ വിവരമറിയിക്കുകയായിരുന്നു. കഴിഞ്ഞ സെപ്തംബറിൽ പെൺകുട്ടി ആത്മഹത്യ ചെയ്തിരുന്നു. ഛത്തീസ്ഗഡിലെയും മദ്ധ്യപ്രദേശിലെയും ആദിവാസി മേഖലകളിൽ നിന്നുള്ള കൂടുതൽ പെൺകുട്ടികൾ ഇത്തരത്തിൽ മനുഷ്യക്കടത്തിന് ഇരയായിട്ടുണ്ടോയെന്നാണ് പൊലീസ് പ്രധാനമായും അന്വേഷിക്കുന്നത്.
