തിരുവനന്തപുരത്ത് അടച്ചു പൂട്ടിയ കമ്പനിയിൽ ചുമട്ടു തൊഴിലാളി ആത്മഹത്യ ചെയ്ത നിലയില്‍
പട്ടിണിമൂലമെന്ന് ആരോപണം
തിരുവനന്തപുരം: തിരുവനന്തപുരത്ത് കയറ്റിറക്ക് തൊഴിലാളി ആത്മഹത്യ ചെയ്ത നിലയില്‍. വേളി മാധവപുരം സ്വദേശി പ്രഫുല്ലകുമാറി (50) നെയാണ് തൂങ്ങിമരിച്ച നിലയില്‍ കണ്ടെത്തിയത്. കൊച്ചുവേളി ഇംഗ്ലീഷ് ഇന്ത്യന്‍ ക്ലേ കമ്പനിയിലെ തൊഴിലാളിയായ ഇദ്ദേഹത്തെ കമ്പനിക്കുള്ളിലാണ് തൂങ്ങിമരിച്ച നിലയില്‍ കണ്ടെത്തിയത്.
പട്ടിണി മൂലമാണ് പ്രഫുല്ലകുമാര്‍ ആത്മഹത്യ ചെയ്തതെന്ന് ആരോപിച്ച് തൊഴിലാളികള്‍ പ്രതിഷേധിക്കുകയാണ്. 145 ദിവസമായി കമ്പനി പൂട്ടിക്കിടക്കുകയാണ്. കമ്പനി തുറന്ന് പ്രവര്‍ത്തിക്കണമെന്നാവശ്യപ്പെട്ട് സമരവും നടക്കുന്നുണ്ട്. പ്രഫുല്ലകുമാര്‍ ഇന്നലവരെ സമരപ്പന്തലില്‍ ഉണ്ടായിരുന്നു. ജില്ലാ കളക്ടര്‍ സ്ഥലത്തെത്തിയാല്‍ മാത്രമേ മൃതദേഹം മാറ്റാന്‍ അനുവദിക്കൂ എന്നാണ് തൊഴിലാളികള്‍ പറയുന്നത്.
സാമ്പത്തികമായി വലിയ പ്രയാസത്തിലായിരുന്നു പ്രഫുല്ലകുമാര്‍ എന്ന് തൊഴിലാളികള്‍ പറയുന്നു. ഇന്നലെ വൈകുന്നേരം മുതല്‍ പ്രഫുല്ലകുമാറിനെ കാണാതായിരുന്നു. ഇന്ന് പുലര്‍ച്ചെയാണ് മൃതദേഹം കണ്ടെത്തിയത്. പ്രഫുല്ലകുമാറിന് ഭാര്യയും രണ്ടു മക്കളുമുണ്ട്.
