ഡോളര് കടത്ത് കേസ്; സ്പീക്കര് ശ്രീരാമകൃഷ്ണനെ കസ്റ്റംസ് ചോദ്യം ചെയ്യും, ചോദ്യം ചെയ്യൽ കൊച്ചിയിൽ.
തിരുവനന്തപുരം: ഡോളര് കടത്ത് കേസില് സ്പീക്കര് ശ്രീരാമകൃഷ്ണനെ കസ്റ്റംസ് ചോദ്യം ചെയ്തേക്കുമെന്ന് സൂചന. ഡോളര് അടങ്ങിയ ബാഗ് പ്രതികള്ക്ക് കൈമാറിയെന്ന ഗുരുതര മൊഴി സ്പീക്കര്ക്ക് എതിരെയുണ്ട്. ഇതേ തുടര്ന്നാണ് കസ്റ്റംസ് ചോദ്യം ചെയ്യലിന് ഒരുങ്ങുന്നത്.സ്വര്ണക്കടത്ത് കേസിലെ പ്രതികളായ സ്വപ്നയും സരിത്തുമാണ് ഡോളര് അടങ്ങിയ ബാഗ് കോണ്സുലേറ്റ് ഓഫീസില് എത്തിക്കാന് സ്പീക്കര് ആവശ്യപ്പെട്ടുവെന്ന് മൊഴി നല്കിയത്. ഇരുവരും മജിസ്ട്രേറ്റിനും കസ്റ്റംസിനും നല്കിയ മൊഴിയില് സ്പീക്കര്ക്കെതിരെ ഗുരുതര ആരോപണങ്ങളാണ് ഉളളത്. അടുത്ത ആഴ്ച നോട്ടീസ് നല്കി സ്പീക്കറെ കൊച്ചി ഓഫീസിലേക്ക് വിളിപ്പിക്കാനാണ് കസ്റ്റംസ് നീക്കം.സ്വപ്നയും സരിത്തും കസ്റ്റംസിന് നല്കിയ മൊഴിയില് സ്പീക്കറെ കൂടാതെ പല പ്രമുഖരുടേയും പേരുകളുണ്ടായിരുന്നു. മജിസ്ട്രേറ്റിന് മുന്നില് ഇതേ മൊഴി ആവര്ത്തിച്ചതോടെയാണ് നോട്ടീസ് നല്കി വിളിച്ചുവരുത്താന് കസ്റ്റംസ് തീരുമാനിച്ചതെന്നാണ് സൂചന. ഉന്നതരുടെ പേരുകള് ഉണ്ടായതിനാല് തന്നെ മൊഴികളില് ആധികാരികത വരുത്താനാണ് മജിസ്ട്രേറ്റിന് രഹസ്യ മൊഴിനല്കിയ ശേഷം തുടര്നടപടികളിലേക്ക് കസ്റ്റംസ് നീങ്ങുന്നത്.കേസുമായി ബന്ധപ്പെട്ട് കോണ്സുലേറ്റ് ജനറലിന്റെ ഡ്രൈവറിനേയും കസ്റ്റംസ് ചോദ്യം ചെയ്യും. അറ്റാഷെയുടെ ഡ്രൈവറെയും വിളിപ്പിക്കുമെന്നാണ് വിവരം.