കുമ്പിടിയാ..കുമ്പിടി; അവിടെയും കണ്ടു, ഇവിടെയും കണ്ടു; സ്വന്തം വാര്‍ഡില്‍ വോട്ട് ചെയ്ത ശേഷം അടുത്തുള്ള നഗരസഭയിലെ വാര്‍ഡിലും വോട്ട് ചെയ്യാനെത്തിയ മുസ്ലിം ലീഗ് പ്രവര്‍ത്തകന്‍ അറസ്റ്റില്‍
കോട്ടയം: സ്വന്തം വാര്‍ഡില്‍ വോട്ട് ചെയ്ത ശേഷം അടുത്തുള്ള നഗരസഭയിലെ വാര്‍ഡിലും വോട്ട് ചെയ്യാനെത്തിയ മുസ്ലിം ലീഗ് പ്രവര്‍ത്തകന്‍ അറസ്റ്റിലായി. ഈരാറ്റുപേട്ടയിലെ സജീവ മുസ്ലിം ലീഗ് പ്രവര്‍ത്തകന്‍ സുലൈമാനാണ് അറസ്റ്റിലായത്. ഇരാറ്റുപേട്ട നഗരസഭയിലാണ് സംഭവം. തീക്കോയി പഞ്ചായത്തിലെ പതിമൂന്നാം വാര്‍ഡില്‍ വോട്ട് ചെയ്ത ശേഷം ഇയാള്‍ ഈരാറ്റുപേട്ട നഗരസഭയിലെ പതിനാലാം ഡിവിഷനായ കൊല്ലം പറമ്പിലും വോട്ട് ചെയ്യാനെത്തുകയായിരുന്നു.
വോട്ട് ചെയ്യാന്‍ കയറിയ സമയം പോളിംഗ് ബൂത്തിലുണ്ടായിരുന്ന ഏജന്റ് സംശയം പ്രകടിപ്പിച്ചതിനെ തുടര്‍ന്ന് പ്രിസൈഡിംഗ് ഓഫിസറുടെ നിര്‍ദ്ദേശ പ്രകാരം സുലൈമാനെ പൊലീസ് അറസ്റ്റു ചെയ്യുകയായിരുന്നു. തീക്കോയി സെന്റ് മേരിസ് സ്‌കൂളില്‍ വോട്ട് ചെയ്തതായും വിരലില്‍ പുരട്ടിയ മഷി മായ്ച്ചുകളയാന്‍ പ്രാദേശിക മുസ്ലിം ലീഗ് പ്രവര്‍ത്തകരില്‍ ചിലര്‍ സഹായിച്ചതായും എല്‍.ഡി.എഫ് പ്രവര്‍ത്തകര്‍ ആരോപിച്ചു. എസ്.ടി.യു ഈരാറ്റുപേട്ട മേഖല നേതാവ് അസീസിന്റെ പിതാവാണ് സുലൈമാന്‍.
