മുഖ്യ തിരഞ്ഞെടുപ്പ് കമ്മിഷണര്‍ക്ക് വോട്ടര്‍ പട്ടികയില്‍ പേരില്ല; ടിക്കാറാം മീണയ്ക്ക് വോട്ട് ചെയ്യാനാകില്ല, പരിഭവം ഇല്ലെന്ന് മീണ
തിരുവനന്തപുരം: വോട്ടര്‍ പട്ടികയില്‍ പേരില്ലാത്തതിനാല്‍ മുഖ്യ തിരഞ്ഞെടുപ്പ് കമ്മിഷണര്‍ ടിക്കാറാം മീണയ്ക്ക് തദ്ദേശ തിരഞ്ഞെടുപ്പില്‍ വോട്ട് ചെയ്യാനായില്ല.
കേരള കൗമുദി ഓൺലൈൻ ആണ് ഈ വാർത്ത പുറത്തു വിട്ടത്. നഗരസഭയിലെ പൂജപ്പുര വാര്‍ഡിലായിരുന്നു അദ്ദേഹത്തിന് വോട്ട്. കഴിഞ്ഞ ലോക്സഭാ തിരഞ്ഞെടുപ്പില്‍ ടിക്കാറാം മീണ പൂജപ്പുരയില്‍ വോട്ട് ചെയ്തിരുന്നു.വോട്ടേഴ്‌സ് ലിസ്റ്റില്‍ പേരുണ്ടോയേന്ന് ഇന്നലെയാണ് പരിശോധിച്ചത്. ലോക്സഭ തിരഞ്ഞെടുപ്പ് ലിസ്റ്റില്‍ പേരുണ്ടായിരുന്നു. ആ ലിസ്റ്റല്ല തദ്ദേശ തിരഞ്ഞെടുപ്പില്‍ ഉപയോഗിക്കുന്നത്. കഴിഞ്ഞ തദ്ദേശ തിരഞ്ഞെടുപ്പ് ലിസ്റ്റിലും തന്റെ പേരുണ്ടായിരുന്നില്ലെന്ന് മുഖ്യ തിരഞ്ഞെടുപ്പ് കമ്മിഷണര്‍ ചൂണ്ടിക്കാട്ടി.ലോക്സഭ വോട്ടേഴ്‌സ് ലിസ്റ്റില്‍ പേരുണ്ടായിരുന്നതിനാല്‍ ഈ ലിസ്റ്റിലും ഉണ്ടാകുമെന്നാണ് കരുതിയത്. ആരെയും കുറ്റപ്പെടുത്താനില്ലെന്നും പരാതി നല്‍കുന്നില്ലെന്നും മീണ പ്രതികരിച്ചു. എന്നാല്‍ ബൂത്ത് ലെവല്‍ ഓഫീസര്‍ക്ക് ഇക്കാര്യം പരിശോധിക്കാമായിരുന്നുവെന്ന് ടിക്കാറാം മീണ വ്യക്തമാക്കി. കൊവിഡ് മാനദണ്ഡം പാലിച്ച് പരമാവധി വോട്ടര്‍മാരെ പോളിംഗ് ബൂത്തിലേക്ക് എത്തിക്കാന്‍ ശ്രമിക്കുമ്പോഴാണ് മുഖ്യ തിരഞ്ഞെടുപ്പ് കമ്മിഷണര്‍ക്ക് തന്നെ വോട്ട് ചെയ്യാനാവാത്ത സാഹചര്യമുണ്ടായത്.
