കൊച്ചി: സുപ്രീം കോടതി പൊളിക്കാൻ ഉത്തരവിട്ട മരടിലെ ഫ്ലാറ്റുകളിലെ താമസക്കാര്‍ക്ക് ഫ്ലാറ്റൊഴിയാൻ സമയം നീട്ടി നല്‍കില്ല. ഇന്ന് വൈകുന്നേരം തന്നെ ഫ്ളാറ്റുകള്‍ ഒഴിയണമെന്നാണ് താമസക്കാര്‍ക്കുള്ള നിര്‍ദ്ദേശം. ഇതു സംബന്ധിച്ച് സബ് കളക്ടര്‍ മേലുദ്യോഗസ്ഥരുമായി നടത്തിയ ചര്‍ച്ച പരാജയപ്പെട്ടു. താത്കാലികമായി പുനഃസ്ഥാപിച്ച ഫ്ലാറ്റുകളിലെ കുടിവെള്ള കണക്ഷനുകളും വൈദ്യുതി കണക്ഷനുകളും ഇന്ന് വൈകിട്ടോടെ വിച്ഛേദിക്കുമെന്ന് നഗരസഭ അറിയിച്ചു.
പൊളിക്കാൻ ഉത്തരവിട്ട അഞ്ച് ഫ്ലാറ്റുകളിലായി 343 കുടുംബങ്ങളാണ് സ്ഥിരമായി താമസിച്ചിരുന്നത്. ഇവരിൽ 113 കുടുംബങ്ങള്‍ മാത്രമാണ് ഇതുവരെ ഫ്ലാറ്റൊഴിഞ്ഞത്. പകരം താമസസൗകര്യം കിട്ടാതെ ഫ്ലാറ്റൊഴിയില്ലെന്ന നിലപാടിലാണ് താമസക്കാര്‍. അതേസമയം, കുടിവെള്ള, വൈദ്യുതി കണക്ഷനുകള്‍ വിച്ഛേദിച്ചാലും താമസക്കാരെ ബലം പ്രയോഗിച്ച് ഇറക്കില്ലെന്ന് സബ് കളക്ടര്‍ വ്യക്തമാക്കി.
ഫ്ലാറ്റൊഴിയാൻ മതിയായ സമയം നല്‍കിയെന്നും ഇനി സമയപരിധി നീട്ടി നല്‍കാനാകില്ലെന്നും സബ് കളക്ടര്‍ പറഞ്ഞു. 343 ഫ്ലാറ്റുകളിൽ 113 എണ്ണം ഇതിനോടകം ഒഴിയുകയും 213 ഫ്ലാറ്റുകളിലുള്ളവര്‍ സാധനങ്ങള്‍ മാറ്റാൻ തുടങ്ങുകയും ചെയ്തിട്ടുണ്ട്. പുനരധിവാസം ആവശ്യപ്പെട്ട് 94 കുടുംബങ്ങള്‍ മാത്രമാണ് രംഗത്തു വന്നിട്ടുള്ളതെന്നും അവര്‍ക്ക് ആവശ്യമായ സൗകര്യങ്ങള്‍ ഏര്‍പ്പെടുത്തുമെന്നും സ്നേഹിൽ കുമാര്‍ പറഞ്ഞു.
അതേസമയം, സര്‍ക്കാര്‍ പകരം താമസസൗകര്യം കണ്ടെത്തിയ പല ഫ്ലാറ്റുകളും ലഭ്യമല്ലെന്നാണ് അറിഞ്ഞതെന്നും നമ്പറുകളിൽ വിളിക്കുമ്പോള്‍ മോശം പ്രതികരണമാണ് ലഭിക്കുന്നതെന്നും ഫ്ലാറ്റുടമകള്‍ ആരോപിച്ചു.
ഫ്ലാറ്റുകള്‍ പൊളിക്കാൻ കരാര്‍ നല്‍കുന്ന കമ്പനിയ്ക്ക് ഈ മാസം 11ന് കെട്ടിടങ്ങള്‍ കൈമാറാനാണ് ആര്‍ഡിഓ അധ്യക്ഷനായ സമിതി തീരുമാനിച്ചിരിക്കുന്നത്. എന്നാൽ കെട്ടിടം കൈമാറുന്ന 11ന് തന്നെ സ്ഫോടനം നടത്തി പൊളിക്കില്ലെന്നും അതിനു മുൻപ് ഏറെ നടപടികള്‍ പൂര്‍ത്തിയാക്കാനുണ്ടെന്നും സബ്കളക്ടര്‍ അറിയിച്ചു. ഇതു സംബന്ധിച്ച് ആളുകളെ ബോധവത്കരിക്കുമെന്നും എല്ലാ നടപടികളും കൃത്യസമയത്ത് ജനങ്ങളെ അറിയിക്കുമെന്നും അദ്ദേഹം കൂട്ടിച്ചേര്‍ത്തു.
