യു.പിയില്‍ കാണാതായ പെണ്‍കുട്ടിയുടെ മൃതദേഹം കരിമ്പിന്‍ തോട്ടത്തില്‍ കൊലപാതകമെന്ന് പൊലീസ്
ലക്‌നൗ: ഉത്തര്‍പ്രദേശില്‍ കാണാതായ പെണ്‍കുട്ടിയെ കരിമ്പിന്‍ പാടത്ത് മരിച്ച നിലയില്‍ കണ്ടെത്തി. ലഖീംപൂര്‍ ഖേരിയിലെ പസഗ്‌വാന്‍ ഗ്രാമത്തിലുളള കരിമ്പിന്‍ തോട്ടത്തിലെ വെള്ളക്കെട്ടിലാണ് കഴുത്തില്‍ മുറിവേറ്റ നിലയില്‍ കൗമാരക്കാരിയുടെ മൃതദേഹം കണ്ടെത്തിയത്.
വെള്ളിയാഴ്ചയാണ് പെണ്‍കുട്ടിയെ ഗ്രാമത്തില്‍ നിന്ന് കാണാതായത്്. തുടര്‍ന്ന് വീട്ടുകാര്‍ പൊലീസില്‍ പരാതി നല്‍കിയിരുന്നു. ഞായറാഴ്ച വൈകീട്ട് സമീപവാസികളാണ് കരിമ്പിന്‍ തോട്ടത്തില്‍ പെണ്‍കുട്ടിയുടെ മൃതദേഹം കണ്ടെത്തിയത്.
കഴുത്തിനു പരിക്കേറ്റ നിലയില്‍ കണ്ടെത്തിയ പെണ്‍കുട്ടിയെ കൊലപ്പെടുത്തിയതാണെന്നാണ് സംശയിക്കുന്നതായി പൊലീസ് പറഞ്ഞു. മൃതദേഹം പോസ്റ്റ്മോര്‍ട്ടത്തിന് അയച്ചു. ഫോറന്‍സിക് സംഘം സ്ഥലത്തെത്തി പരിശോധന നടത്തുമെന്ന് അഡീഷണല്‍ പൊലീസ് സൂപ്രണ്ട് എ.കെ സിങ്ങ് അറിയിച്ചു.
ഗ്രാമത്തില്‍ ഒരു വിധത്തിലുള്ള സമുദായ സംഘര്‍ഷവും നിലനിന്നിരുന്നില്ലെന്ന് പെണ്‍കുട്ടിയുടെ രക്ഷിതാക്കള്‍ പറഞ്ഞിരുന്നതായി പൊലീസ് അറിയിച്ചു.
ഖേരി പൊലീസ് സൂപ്രണ്ട് വിജയ് ധുള്ളിന്റെ നേതൃത്വത്തില്‍ പസഗ്?വാന്‍ പൊലീസിനെ കൂടാതെ ക്രൈംബ്രാഞ്ച് സംഘത്തെയും അന്വേഷണത്തിനായി നിയോഗിച്ചിട്ടുണ്ട്. പോസ്റ്റ്മോര്‍ട്ടം റിപ്പോര്‍ട്ട് ലഭിച്ച ശേഷം തുടര്‍നടപടികള്‍ സ്വീകരിക്കുമെന്ന് പൊലീസ് അറിയിച്ചു.
