കോവിഡ് ബാധിച്ച് ചികിത്സയിലിരുന്ന പോക്‌സോ കേസ് പ്രതി നഴ്‌സിന്റെ ഫോണുമായി മുങ്ങി
കൊച്ചി: കോവിഡ് സ്ഥിരീകരിച്ച് നെടുമ്പാശ്ശേരി ഫസ്റ്റ് ലൈന്‍ ട്രീറ്റ്‌മെന്റ് സെന്ററില്‍ പ്രവേശിപ്പിച്ചിരുന്ന പോക്‌സോ കേസ് പ്രതിയാണ് മുങ്ങിയത്. മാമലക്കണ്ടം പാറയ്ക്കല്‍ വീട്ടില്‍ മുത്തുരാമകൃഷണന്‍ എന്നയാളാണ് ചികിത്സാ കേന്ദ്രത്തിലെ നഴ്‌സിന്റെ മൊബൈല്‍ ഫോണുമെടുത്താണ് കടന്നു കളഞ്ഞത്.
കാടാമ്പുഴ പൊലീസ് സ്റ്റേഷനില്‍ രജിസ്റ്റര്‍ ചെയ്ത പോക്‌സോ കേസിലെ പ്രതിയായ ഇയാള്‍ക്ക് റിമാന്‍ഡില്‍ കഴിയവെയാണ് കോവിഡ് സ്ഥിരീകരിച്ചത്. തുടര്‍ന്ന് സിയാലിലെ ഫസ്റ്റ് ലൈന്‍ ട്രീറ്റ്‌മെന്റ് സെന്ററിലേക്ക് മാറ്റി. ഇവിടെ നിന്നാണ് ചാടിപ്പോയത്.
രക്ഷപ്പെട്ട സമയത്ത് കാവി മുണ്ടും ചുവന്ന ഷര്‍ട്ടുമായിരുന്നു വേഷം എന്നാണ് അറിയിച്ചിരിക്കുന്നത്. മുടി നീട്ടി വളര്‍ത്തിയിട്ടുമുണ്ട്. ഇയാളെ കുറിച്ച് എന്തെങ്കിലും സൂചന ലഭിച്ചാല്‍ എത്രയും വേഗം പൊലീസിനെ അറിയിക്കണമെന്നാണ് നിര്‍ദേശം. സംഭവത്തില്‍ അങ്കമാലി പൊലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചിട്ടുണ്ട്
