കാസർഗോഡ് വെള്ളരിക്കുണ്ട് ചീര്‍ക്കയത്ത് കണ്ടെത്തിയ മനുഷ്യ മുഖ സാദൃശ്യമുള്ള ചിലന്തി കൌതുകമാകുന്നു. ചീര്‍ക്കയത്തെ പാട്ടത്തില്‍ അപ്പുകുട്ടന്‍ നായരുടെ കൃഷി തോട്ടത്തിലാണ് ഞായറാഴ്ച രാവിലെ ഈ അപൂര്‍വ്വ ഇനം ചിലന്തിയെ കണ്ടെത്തിയത്. ഓറഞ്ചും മഞ്ഞയും കറുപ്പും വെളുപ്പും തവിട്ടും കലര്‍ന്ന പഞ്ചവര്‍ണ്ണ നിറത്തിലാണ് ചിലന്തിയുടെ രൂപം
മനുഷ്യമുഖം വ്യക്തമാക്കുന്ന തരത്തില്‍ മുഖവും വായയും കണ്ണും മൂക്കും ചെവിയും ഉള്‍പ്പെടെ എല്ലാം ഒത്തിണങ്ങിയ തരത്തിലാണ് ചിലന്തിയുടെ രൂപം. ചെവിയുടെ രണ്ട് ഭാഗത്തും രോമങ്ങളുമുണ്ട്. കുരുമുളക് വള്ളിയില്‍ വലകെട്ടി തൊട്ടിലാടും വിധത്തില്‍ മലര്‍ന്നു കിടന്ന് ഇര പിടിക്കുന്ന രീതിയിലായിരുന്നു ഈ ചിലന്തി. ഇന്ത്യയില്‍ 59 കുടുംബങ്ങളിലായി 1442 സ്പീഷിസുകളെ ഇതുവരെ കണ്ടെത്തിയിട്ടുണ്ട്.
കേരളത്തില്‍ മാത്രം 500 ഓളം ഇനത്തില്‍ ചിലന്തികളെ കണ്ടെത്തിയിട്ടുണ്ടെങ്കിലും മനുഷ്യ സാദൃശ്യ മുഖമുള്ള ഈ ചിലന്തിയെ ആദ്യമായാണ് കണ്ടെത്തുന്നതെന്ന് ശാസ്ത്രജ്ഞര്‍ പറയുന്നു.
ചൈനയിലെ വുഹാന്‍ പ്രവശ്യയിലും മനുഷ്യമുഖ സാദൃശ്യമുള്ള ചിലന്തിയെ കഴിഞ്ഞ വര്‍ഷം കണ്ടെത്തിയിരുന്നു. ചീര്‍ക്കയത്തെ അപൂര്‍വ ചിലന്തിയെ കാണാന്‍ ഇപ്പോള്‍ നിരവധി പേരെത്തുന്നുണ്ട്.
