ഉപതെരഞ്ഞെടുപ്പുകള്‍ നവംബറില്‍; തീയതി പിന്നീട് പ്രഖ്യാപിക്കും
ന്യൂഡല്‍ഹി: ചവറ, കുട്ടനാട് ഉപതെരഞ്ഞെടുപ്പുകള്‍ നവംബറില്‍ നടക്കുമെന്ന് കേന്ദ്ര തെരഞ്ഞെടുപ്പ് കമ്മീഷന്‍. ബിഹാര്‍ തെരഞ്ഞെടുപ്പിനൊടൊപ്പം ആയിരിക്കും ഉപതെരഞ്ഞെടുപ്പ് നടക്കുക. കേന്ദ്ര തെരഞ്ഞെടുപ്പ് കമ്മീഷന്റെ യോഗത്തിലാണ് രാജ്യത്തെ ഉപതെരഞ്ഞെടുപ്പുകള്‍ സംബന്ധിച്ച് തീരുമാനമായത്.
Also Read: തമിഴ്‌നാട്ടിലെ പടക്ക നിർമ്മാണ ഫാക്‌ടറിയിൽ സ്‌ഫോടനം; ഏഴ് മരണം, നാല് പേർക്ക് പരിക്ക്
ബിഹാര്‍ തെരഞ്ഞെടുപ്പിനോടൊപ്പം രാജ്യത്തെ 65 മണ്ഡലങ്ങളില്‍ ഉപതെരഞ്ഞെടുപ്പുകളും നടത്താമെന്നാണ് തീരുമാനമായിട്ടുള്ളത്. 64 നിയമസഭാ മണ്ഡലങ്ങളും ഒരു പാര്‍ലമെന്റ് മണ്ഡലവുമാണ് പട്ടികയില്‍ ഉള്‍പ്പെടുത്തുന്നത്. അടുത്ത നിയമസഭാ തെരഞ്ഞെടുപ്പ് നടക്കാനിരിക്കുന്ന മണ്ഡലങ്ങളില്‍ ഉപതെരഞ്ഞെടുപ്പ് നടത്തുമോയെന്ന കാര്യത്തില്‍ വ്യക്തതയില്ല.
തെരഞ്ഞെടുപ്പ് തീയതികള്‍ പിന്നീട് പ്രഖ്യാപിക്കുമെന്ന് കമ്മീഷന്‍ വ്യക്തമാക്കി. കൊവിഡ് വ്യാപന സാഹചര്യം ഉണ്ടെങ്കിലും ഉപതെരഞ്ഞെടുപ്പുകള്‍ ഉപേക്ഷിക്കേണ്ടെന്നാണ് തെരഞ്ഞെടുപ്പ് കമ്മീഷന്റെ തീരുമാനം. നാമനിര്‍ദേശ പത്രിക സമര്‍പ്പണം വെര്‍ച്വലായി നടത്തും.
കൊവിഡ് പശ്ചാത്തലത്തില്‍ നടക്കുമ്പോള്‍ തെരഞ്ഞെടുപ്പിന് എന്തൊക്കെ നടപടി ക്രമങ്ങളാണ് പാലിക്കേണ്ടതെന്ന് സംബന്ധിച്ച് വിവിധ രാഷ്ട്രീയ പാര്‍ട്ടികളുമായി നടത്തിയ ചര്‍ച്ചയുടെ അടിസ്ഥാനത്തിലുള്ള തീരുമാനങ്ങളും വരുംദിവസങ്ങളില്‍ ഉണ്ടാകും.
തോമസ് ചാണ്ടിയുടെ മരണത്തെ തുടര്‍ന്ന് കുട്ടനാടും വിജയന്‍പിള്ളയുടെ മരണത്തെ തുടര്‍ന്ന് ചവറയിലുമാണ് ഉപതെരഞ്ഞെടുപ്പ് ആവശ്യമായി വന്നത്. സ്ഥാനാര്‍ത്ഥികളെ നിര്‍ണ്ണയിക്കുന്നത് ഉള്‍പ്പെടെ ഉപതെരഞ്ഞെടുപ്പിനുള്ള തയ്യാറെടുപ്പുകള്‍ വിവിധ രാഷ്ട്രീയ പാര്‍ട്ടികള്‍ ആരംഭിച്ച സാഹചര്യത്തിലാണ് കൊവിഡ് വ്യാപനം രൂക്ഷമായത്.
