100 ദിവസം 100 പദ്ധതി, കര്മ്മപരിപാടിയുമായി മുഖ്യമന്ത്രി, ഭക്ഷ്യകിറ്റ് വിതരണം തുടരും, പെന്ഷന് കൂട്ടി!
തിരുവനന്തപുരം: കൊവിഡിനെ തുരത്താന് കൈ മെയ് മറന്ന് പ്രവര്ത്തിക്കുന്ന സംസ്ഥാനത്ത് നൂറ് ദിന പ്രത്യേക കര്മ്മ പരിപാടി പ്രഖ്യാപിച്ച് മുഖ്യമന്ത്രി പിണറായി വിജയന്. നൂറ് ദിവസം നൂറ് പദ്ധതികളാണ് നടപ്പിലാക്കുക. സാധാരണക്കാര്ക്ക് പരമാവധി സഹായം നേരിട്ട് എത്തിക്കുമെന്ന് മുഖ്യമന്ത്രി പറഞ്ഞു. കൊവിഡ് കാലത്തും വികസന പ്രവര്ത്തനങ്ങള്ക്ക് അവധിയില്ല. കൊവിഡ് കാലത്തും എല്ലാവര്ക്കും സന്തോഷകരമായ ഓണം ഉറപ്പ് വരുത്താന് സര്ക്കാര് ശ്രമിച്ചിട്ടുണ്ടെന്നും മുഖ്യമന്ത്രി പറഞ്ഞു.
റേഷന് കടകള് വഴിയുളള ഭക്ഷ്യകിറ്റ് വിതരണം നാല് മാസത്തേക്ക് കൂടി തുടരും. സാമൂഹിക ക്ഷേമ പെന്ഷന് നൂറ് രൂപ വീതം ഉയര്ത്തി. പെന്ഷന് എല്ലാ മാസവും വിതരണം നടത്തുമെന്നും മുഖ്യമന്ത്രി പറഞ്ഞു. 153 കുടുംബാരോഗ്യ കേന്ദ്രങ്ങള് 100 ദിവസം കൊണ്ട് ഉദ്ഘാടനം നടത്തും. 10 പുതിയ ഡയാലിലിസ് കേന്ദ്രങ്ങള് ആരംഭിക്കും. കൊവിഡ് പരിശോധന പ്രതിദിനം അരലക്ഷമാക്കും. ആരോഗ്യവകുപ്പില് 100 ദിവസത്തിനുളളില് കൂടുതല് നിയമനങ്ങള് നടത്തുമെന്നും മുഖ്യമന്ത്രി പ്രഖ്യാപിച്ചു.
2021 ജനുവരിയില് സ്കൂളുകള് തുറക്കാനാകുമെന്ന് കരുതുന്നു. 100 ദിവസങ്ങള്ക്കുളളില് 250 പുതിയ സ്കൂള് കെട്ടിടങ്ങള് നിര്മ്മാണം ആരംഭിക്കും. 11,400 സ്കൂളുകളില് ഹൈടെക് ലാബുകള് സജ്ജീകരിക്കും. സര്ക്കാര് എയ്ഡഡ് കോളേജുകളില് 150 പുതിയ കോഴ്സുകള് തുടങ്ങും. പുതിയ 10 ഐടിഐ ഉദ്ഘാടനം ചെയ്യും. 69 തീരദേശ റോഡുകള് ഉദ്ഘാടനം ചെയ്യും. പിഎസ്സിക്ക് നിയമനം വിട്ട 11 സ്ഥാപനങ്ങളില് സ്പെഷ്യല് റൂള്സ് ഉണ്ടാക്കും. പത്ത് കോളേജ് ഹയര് സെക്കന്ഡറി രംഗത്ത് ആയിരം തസ്തിക ഉണ്ടാക്കും.