ആഗസ്റ്റ് 15ന് കോവിഡ് എണ്ണം 40,000 കവിയും; ട്രിപ്പിള്‍ ലോക്ക് ഡൗണ്‍ ഫലപ്രദമാകുന്നില്ല,ജനം ദാരിദ്യക്കെണിയിൽ കുടുങ്ങും മുന്നറിയിപ്പുമായി മുൻ ഡി ജി പി ജേക്കബ് പുന്നൂസ്
കൊച്ചി :സംസ്ഥാനത്ത് ഓഗസ്റ്റ് 15 ന് കൊവിഡ് കേസുകള്‍ 41,000 കടക്കുമെന്ന് മുന്‍ ഡിജിപി ജേക്കബ് പുന്നൂസ്. ഫേസ്ബുക്കിലൂടെയാണ് അദ്ദേഹത്തിന്റെ പ്രതികരണം. അടച്ചുപൂട്ടല്‍ ഫലപ്രദമാകാത്തതിന്റെ കാരണം ഈ രോഗത്തിന്റെ പ്രത്യേക സ്വഭാവമാണെന്ന് അദ്ദേഹം പറഞ്ഞു. ജൂലായ് അഞ്ച് മുതല്‍ നടപ്പാക്കിവരുന്ന ട്രിപ്പിള്‍ ലോക്ക് ഡൗണ്‍ ഉള്‍പ്പെടെയുള്ള നടപടികള്‍ ഫലപ്രദമായിട്ടില്ലെന്ന് അദ്ദേഹം ഫേസ്ബുക്ക് കുറിപ്പിലൂടെ പങ്കുവെച്ചു.
ഓഗസ്റ്റ് 15 ന് കേസുകള്‍ 41,000 ആകും
-15-41000-
ജൂലായ് ആദ്യവാര നിരക്ക് തുടര്‍ന്നാല്‍ ഓഗസ്റ്റ് 15 ന് കേസുകള്‍ 40,000 ആകുമെന്ന് ജൂലായ് 15 ന് ചൂണ്ടിക്കാണിച്ചിരുന്നതായി അദ്ദേഹം പറഞ്ഞു. ട്രിപ്പിള്‍ ലോക്ക് ഡൗണ്‍, കടയടയ്ക്കല്‍, കടലടയ്ക്കല്‍, വഴിയടയ്ക്കല്‍ മുതലായ പല കര്‍ശന നടപടികളും ജൂലായ് 5 മുതല്‍ സംസ്ഥാനത്ത് നല്ല പ്രതീക്ഷയോടെ ശുഭാപ്തി വിശ്വാസത്തോടെ നല്ല ഉദ്ദേശത്തോടെ നടപ്പാക്കുകയാണ്. എന്നാല്‍, അതുകൊണ്ട് വ്യാപനത്തോതില്‍ കുറവുണ്ടായിട്ടില്ലെന്നും ഓഗസ്റ്റ് 15 ന് കേസുകള്‍ 41,000 ആകുമെന്നും ജേക്കബ് പുന്നൂസ് പറഞ്ഞു.
അടച്ചുപൂട്ടല്‍ ഫലപ്രദമാകാത്തത് രോഗത്തിന്റെ പ്രത്യേക സ്വഭാവം
അടച്ചുപൂട്ടല്‍ ഫലപ്രദമാകാത്തതിന്റെ കാരണം ഈ രോഗത്തിന്റെ പ്രത്യേക സ്വഭാവമാണെന്ന് ജേക്കബ് പുന്നൂസ് പറഞ്ഞു. നാം ടെസ്റ്റ് ചെയ്ത് സ്വീകരിക്കുന്നതിനേക്കാള്‍ രണ്ടോ മൂന്നോ ഇരട്ടി ആളുകളെങ്കിലും ലക്ഷണമില്ലാത്തതോ വളരെ നിസ്സാര ലക്ഷണങ്ങളോ ഉള്ളവരായി സമൂഹത്തിലുണ്ട്. അവര്‍ പോലും സ്വയം അറിയാതെ, മറ്റാരുമറിയാതെ, അവര്‍ ആയിരിക്കുന്ന വീടുകളിലും അയല്‍ പ്രദേശത്തും രോഗം പടര്‍ത്തിക്കൊണ്ടേയിരിക്കുമെന്ന് അദ്ദേഹം മുന്നറിയിപ്പ് നല്‍കി.
എല്ലായ്‌പ്പോഴും മാസ്‌ക് ധരിക്കണം
അടച്ചുപൂട്ടലിനു വേണ്ടി വിനിയോഗിക്കുന്ന വിഭവശേഷിയും സഹിക്കുന്ന വരുമാനനഷ്ടവും ഈ ഘട്ടത്തില്‍, മാസ്‌ക് മൂലമോ അകലം പാലിക്കല്‍ മൂലമോ ലഭിക്കാത്ത ഒരു പ്രത്യേക ഗുണവും നല്‍കില്ല എന്നത് വ്യക്തമാണ്. മൂക്കടയ്ക്കലും വായടയ്ക്കലുമാണ് കട അടയ്ക്കുന്നതിനേക്കാള്‍ നല്ലത്. ആര്‍ക്കും ആരില്‍ നിന്നും എപ്പോഴും രോഗം പകരാവുന്ന ഈ സ്ഥിതിയില്‍ എല്ലാവരും എപ്പോഴും മാസ്‌ക് ധരിച്ച് അകലം പാലിക്കുന്നത് നടപ്പാക്കാനാണ് നാം പൂര്‍ണവിഭവശേഷിയും ഉപയോഗിച്ച് ശ്രമിക്കേണ്ടത്.
സാമൂഹിക അച്ചടക്കവും ഒരുമയും വേണം
കൊവിഡിനെ മറികടക്കാന്‍ സാമൂഹിക അച്ചടക്കവും ഒരുമയും വേണമെന്ന് ജേക്കബ് പുന്നൂസ് മുന്നറിയിപ്പ് നല്‍കി. ഒരു പരിധി കഴിഞ്ഞാല്‍ വരുമാനഷ്ടം മൂലം തന്നെ ജീവനും നഷ്ടപ്പെടും എന്നത് മറക്കരുത്. ജീനാശത്തില്‍ നിന്നും ദാരിദ്ര്യക്കെണിയില്‍ നിന്നും ഒരേ സമയം രക്ഷപ്പെടണമെന്ന് അദ്ദേഹം നിര്‍ദേശിച്ചു.
