കേരളത്തില്‍ മദ്യശാലകള്‍ ബുധനാഴ്ച തുറക്കും:ബാറുകളിൽ ബെവ്‌കോ നിരക്കിൽ മദ്യം ലഭിക്കും
സംസ്ഥാനത്ത് മദ്യത്തിന് നികുതി വര്‍ധിപ്പിക്കാന്‍ മന്ത്രിസഭാ യോഗം തീരുമാനിച്ചിരുന്നു. സംസ്ഥാനം കടുത്ത സാമ്പത്തിക പ്രതിസന്ധിയിലൂടെ കടന്നുപോകുന്ന ഘട്ടത്തിലാണ് മദ്യത്തിന് വിലകൂട്ടാന്‍ തീരുമാനിച്ചത്
കോഴിക്കോട്: കേരളത്തില്‍ മദ്യശാലകള്‍ മറ്റന്നാള്‍ മുതല്‍ തുറന്നു പ്രവര്‍ത്തിക്കും. ബെവറേജസ് ഔട്ടലെറ്റുകള്‍ എല്ലാം തുറന്നു പ്രവര്‍ത്തിപ്പിക്കാനാണ് തീരുമാനം. ബാറുകളിലെ പാഴ്സല് കൗണ്ടറുകളടക്കം ബുധനാഴ്ച തുറക്കും.
അതിനൊപ്പം കേരളത്തിലെ സലൂണുകള്‍ക്കും സര്‍ക്കാര്‍ പവര്‍ത്തനാനുമതി നല്‍കിയിട്ടുണ്ട്. മുടി വെട്ടുന്നതിന് മാത്രമാണ് അനുമതി നല്‍കിയിരിക്കുന്നത്.സംസ്ഥാനത്ത് നടത്താനിരുന്ന എസ്.എസ്.എല്‍.സി, പ്ലസ്ടു പരീക്ഷകള്‍ ജൂണിലേക്ക് മാറ്റിവെച്ചു.
കേരളത്തില്‍ മദ്യശാലകള്‍ തുറക്കുമെന്ന് നേരത്തെ എക്സൈസ് മന്ത്രി ടി.പി രാമകൃഷ്ണന്‍ അറിയിച്ചിരുന്നു.
എല്ലാ മദ്യവില്‍പ്പന ശാലകളും ഒന്നിച്ച് തുറക്കാനാണ് തീരുമാനമെന്നും മദ്യശാലകളുടെ പ്രവര്‍ത്തന സമയത്തിലും മാറ്റം വരുമെന്നും മന്ത്രി വ്യക്തമാക്കിയിരുന്നു.
ബെവ്കോയിലെ അതേ വിലയ്ക്ക് ബാറില്‍ നിന്ന് മദ്യം ലഭിക്കും. ബാറില്‍ പാഴ്സലിന് പ്രത്യേകം കൗണ്ടറുകള്‍ സജ്ജീകരിക്കും. പാഴ്സല് താത്ക്കാലിക സംവിധാനമാണെന്നും മന്ത്രി അറിയിച്ചിരുന്നു.
അതേസമയം സംസ്ഥാനത്ത് മദ്യത്തിന് നികുതി വര്‍ധിപ്പിക്കാന്‍ മന്ത്രിസഭാ യോഗം തീരുമാനിച്ചിരുന്നു. സംസ്ഥാനം കടുത്ത സാമ്പത്തിക പ്രതിസന്ധിയിലൂടെ കടന്നുപോകുന്ന ഘട്ടത്തിലാണ് മദ്യത്തിന് വിലകൂട്ടാന്‍ തീരുമാനിച്ചത്. കൊവിഡ് പ്രതിരോധത്തിനായാണ് പ്രത്യേക സെസ് ഏര്‍പ്പെടുത്തിയത്.
ബാറുകളില്‍ നിന്ന് മദ്യം പാഴ്സലായി കൊടുക്കുന്നതിലൂടെയും കൂടുതല്‍ വരുമാനം സര്‍ക്കാര്‍ പ്രതീക്ഷിക്കുന്നുണ്ട്. 605 ബാറുകളാണ് സംസ്ഥാനത്ത് പ്രവര്‍ത്തിക്കുന്നത്. ബാറുകളിലൂടെ പാഴ്സലായി നല്‍കുന്നതിലൂടെ കൂടുതല്‍ വരുമാനം സര്‍ക്കാരില്‍ എത്തുമെന്നാണ് പ്രതീക്ഷിക്കുന്നത്.
വിദേശ മദ്യത്തിന് 35 ശതമാനം വരെയും ബിയറിനും വൈനിനും പത്ത് ശതമാനവും നികുതി കൂട്ടാനാണ് സര്‍ക്കാര്‍ തീരുമാനിച്ചിരിക്കുന്നത്.
ഇതോടെ ചില ബ്രാന്‍ഡുകളുടെ പുതിയ വില വിവരമാണ് ബവ്‌റിജസ് കോര്‍പറേഷന്‍ പുറത്തുവിട്ടിരുന്നു. ഹണിബീക്ക് 620 ആണ് പുതിയ വില. നേരത്തെ ഇത് 560 രൂപയായിരുന്നു.
മറ്റ് ബ്രാന്‍ഡുകളുടെ പുതിയ വില ഇങ്ങനെയാണ്. ബ്രാക്കറ്റില്‍ പഴയവില
സെലിബ്രേഷന്‍ 580 (520), ഓള്‍ഡ് മങ്ക് റം 850 (770), എംസി ബ്രാന്‍ഡി 620 (560), എംഎച്ച് ബ്രാന്‍ഡി 910 (820), ബക്കാര്‍ഡി 1440 (1290), സിഗ്‌നേച്ചര്‍ 1410 (1270), മാജിക് മൊമന്റ്‌സ് 1010 (910).
ബിയറിന് 10രൂപ മുതലും വൈനിന് 25രൂപ മുതലും കൂടും. കിങ്ഫിഷര്‍ 110 (100), കിങ്ഫിഷര്‍ ബ്ലൂ 121 (110), ടുബോര്‍ഗ് 100 (90).
