കുമ്പള, പച്ചമ്പളയിൽ അഭ്യാസ പ്രകടനത്തിനിടയിൽ രജിസ്ട്രേഷൻ പോലുമാകാത്ത പുത്തൻ താർ ജീപ്പ് കത്തി നശിച്ചു; യുവാക്കൾ രക്ഷപ്പെട്ടത് ഭാഗ്യത്തിന്
കാസർകോട്: അഭ്യാസ പ്രകടനത്തിനിടയിൽ രജിസ്ട്രേഷൻ പോലുമാകാത്ത പുത്തൻ താർ ജീപ്പ് പൂർണ്ണമായും കത്തി നശിച്ചു. വാഹനത്തിനകത്ത് ഉണ്ടായിരുന്നവർ ഭാഗ്യത്തിനാണ് രക്ഷപ്പെട്ടത്. വ്യാഴാഴ്‌ച ഉച്ചയ്ക്ക് 12 മണിയോടെ കുമ്പള, പച്ചമ്പളയിലാണ് സംഭവം. ഹൊസങ്കടി, സ്വദേശിനിയുടെ പേരിലുള്ളതാണ് കത്തിനശിച്ച വാഹനത്തിൻ്റെ താൽക്കാലിക രജിസ്ട്രേഷൻ. ഏതാനും യുവാക്കളാണ് താർ ജീപ്പുമായി പച്ചമ്പളയിലെ ഗ്രൗണ്ടിലെത്തിയത്. വാഹനം ഗ്രൗണ്ടിൽ അഭ്യാസ പ്രകടനം നടത്തിക്കൊണ്ടിരിക്കെ പെട്ടെന്നു തീപിടിക്കുകയായിരുന്നു. തീ ആളിപടരാൻ തുടങ്ങിയതോടെ വാഹനം നിർത്തി അകത്തുണ്ടായിരുന്നവർ ഇറങ്ങിയോടി. വിവരമറിഞ്ഞ് ഉപ്പളയിൽ നിന്നു ഫയർഫോഴ്‌സ് എത്തി തീയണച്ചുവെങ്കിലും അപ്പോഴേക്കും വാഹനം പൂർണ്ണമായും കത്തി നശിച്ചിരുന്നു. തീ പിടിത്തത്തിൻ്റെ കാരണം വ്യക്തമായിട്ടില്ല.
