ആദ്യം പറഞ്ഞത് തൂങ്ങിമരിച്ചെന്ന്, മൃതദേഹം കിടന്നത് നിലത്ത്, കഴുത്തിൽ മുറിവുകളും; ഇടുക്കിയിൽ യുവാവിനെ മരിച്ച നിലയിൽ കണ്ടെത്തിയ സംഭവം കൊലപാതകം
ഇടുക്കി: ന്യൂനഗറിൽ യുവാവിനെ മരിച്ച നിലയിൽ കണ്ടെത്തിയ സംഭവം കൊലപാതകമെന്ന് പോലീസ്. ന്യൂനഗർ സ്വദേശി സൂര്യയെയാണ് കഴിഞ്ഞ ദിവസം വീടിനുള്ളിൽ മരിച്ച നിലയിൽ കണ്ടെത്തിയത്. സംഭവത്തിൽ സൂര്യയുടെ സഹോദരൻ വിഘനേശ്വരനെ പോലീസ് അറസ്റ്റു ചെയ്തു.
സഹോദരങ്ങൾ തമ്മിൽ വഴക്കുണ്ടാകാറുണ്ടെന്ന് പോലീസിനു വിവരം ലഭിച്ചതിനെത്തുടർന്ന് പ്രതിയെ ചോദ്യം ചെയ്‌തപ്പോൾ കുറ്റം സമ്മതിക്കുകയായിരുന്നു. നിർമാണക്കരാറുകാരൻ്റെ സഹായിയായിരുന്നു സൂര്യ. കഴിഞ്ഞ ദിവസം രാവിലെ ജോലിക്കു ചെല്ലാതിരുന്നതോടെ അന്വേഷിക്കുകയും മരിച്ച നിലയിൽ കണ്ടെത്തുകയുമായിരുന്നു.
മാതാവും സഹോദരനുമാണ് അടുത്തവീട്ടിൽ താമസിച്ചിരുന്നത്. യുവാവ് തൂങ്ങിമരിച്ചെന്നാണു ബന്ധുക്കൾ ആദ്യം പോലീസിനോടു പറഞ്ഞത്. എന്നാൽ, മൃതദേഹം നിലത്തു കിടക്കുന്ന നിലയിലായിരുന്നു. കഴുത്തിൽ മുറിവുകളുമുണ്ടായിരുന്നു. ഇതേത്തുടർന്ന് പോലീസ് വിശദമായ അന്വേഷണം നടത്തുകയും പ്രതിയെ അറസ്റ്റ് ചെയ്യുകയുമായിരുന്നു.
