ചട്ടഞ്ചാലിൽ പട്ടാപ്പകൽ കാറിലെത്തിയ സംഘം യുവാവിനെ തട്ടിക്കൊണ്ടു പോയി
കാസർകോട്: സുഹൃത്തിനോട് സംസാരിച്ചു നിൽക്കുന്നതിനിടയിൽ യുവാവിനെ കാറിലെത്തിയ സംഘം തട്ടിക്കൊണ്ടു പോയി. ചട്ടഞ്ചാൽ, കുന്നാറയിലെ കെ. അർഷാദി(27)നെയാണ് തട്ടിക്കൊണ്ടു പോയത്. സംഭവത്തിൽ ചെങ്കള, സിറ്റിസൺ നഗറിലെ തമ്മുവിനും കണ്ടാൽ അറിയാവുന്ന മൂന്നു പേർക്കും എതിരെ മേൽപ്പറമ്പ് പൊലീസ് കേസെടുത്തു. യുവാവിനെ കണ്ടെത്താൻ പൊലീസ് അന്വേഷണം ഊർജ്ജിതമാക്കി. വെള്ളിയാഴ്‌ച ഉച്ചയ്ക്കാണ് സംഭവം. കുന്നാറയിലെ ജീലാനി സൂപ്പർ മാർക്കറ്റിനു സമീപത്തുള്ള ഹോട്ടലിനടുത്ത് സുഹൃത്തുമായി സംസാരിച്ചു നിൽക്കുകയായിരുന്നു അഷ്റഫ്. ഇതിനിടയിൽ സ്വിഫ്റ്റ് ഡിസെയർ കാറിലെത്തിയ സംഘം തട്ടിക്കൊണ്ടു പോവുകയായിരുന്നുവെന്നു മേൽപ്പറമ്പ് പൊലീസ് രജിസ്റ്റർ ചെയ്‌ത കേസിൽ പറയുന്നു. സാമ്പത്തിക ഇടപാടുമായി ബന്ധപ്പെട്ട തർക്കമാണ് തട്ടിക്കൊണ്ടു പോകലിനു പിന്നിലെന്നു സംശയിക്കുന്നതായി കൂട്ടിച്ചേർത്തു.
